TDP: గ్రూప్-1కు 85 రోజులే గడువు సరికాదన్న టీడీపీ ఎమ్మెల్సీ

అమరావతి: గ్రూప్‌-1 కు 85 రోజుల గడువు ఇస్తూ ఏపీపీఎస్సీ (APPSC) తీసుకున్న నిర్ణయంపై టీడీపీ ఎమ్మెల్సీ పరుచూరి అశోక్‌ బాబు (TDP MLC Ashokbabu) తీవ్ర స్థాయిలో విరుచుకుపడ్డారు. సోమవారం మీడియాతో మాట్లాడుతూ.. ఏపీ పబ్లిక్ సర్వీస్ కమిషన్ రాజకీయ పునరావాస కేంద్రంగా మార్చి నిరుద్యోగుల అభ్యున్నతికి, ఉన్నతికి నిర్ణయాలు తీసుకొవాల్సిన ఏపీపీఎస్సీ వారిని రోడ్డున పడేసేలా వ్యవహరిస్తోందన్నారు. గ్రూప్-1 మెయిన్స్ పరీక్షలకు 85 రోజులే గడువు ఇవ్వడం సరికాదన్నారు. నిరుద్యోగుల జీవితాలతో చేలగాటమాడేలా ఏపీపీఎస్సీ వ్యవహరిస్తోందని మండిపడ్డారు. 85 రోజుల్లో మెయిన్స్ పరీక్షకు ఏవిధంగా సిద్ధమవుతారని ఏ సలహాదారుడు చెప్పారని ప్రశ్నించారు. కనీసం మరో 3 నెలల సమయం ఇవ్వాలని ప్రభుత్వాన్ని డిమాండ్ చేశారు. పాదయాత్రలో ప్రతి సంవత్సరం జాబ్ క్యాలెండర్ విడుదల చేస్తామని చెప్పి అధికారంలోకి వచ్చాక మాట తప్పి మడమ తిప్పారని విమర్శించారు. అనర్హులకు, అసమర్థులకు అధికారం ఇస్తే గత నాలుగేళ్లలో ఏమి జరిగిందో మళ్లీ అదే జరుగుతుందని గ్రహించాలన్నారు. నిరుద్యోగుల ఆగ్రహనికి గురవడం ఖాయమని పరుచూరి అశోక్ బాబు స్పష్టం చేశారు.