Road Accident: దర్శి బస్సు ప్రమాదంపై చంద్రబాబు, లోకేష్ దిగ్భ్రాంతి
ABN , First Publish Date - 2023-07-11T09:52:34+05:30 IST
జిల్లాలోని దర్శి వద్ద జరిగిన బస్సు ప్రమాదంలో ఏడుగురు మృతిచెందడంపై టీడీపీ అధినేత చంద్రబాబు నాయుడు, ఆ పార్టీ జాతీయ ప్రధాన కార్యదర్శి నారా లోకేశ్ తీవ్ర దిగ్భ్రాంతి వ్యక్తం చేశారు.
ప్రకాశం: జిల్లాలోని దర్శి వద్ద జరిగిన బస్సు ప్రమాదంలో ఏడుగురు మృతిచెందడంపై టీడీపీ అధినేత చంద్రబాబు నాయుడు, ఆ పార్టీ జాతీయ ప్రధాన కార్యదర్శి నారా లోకేశ్ తీవ్ర దిగ్భ్రాంతి వ్యక్తం చేశారు. పెళ్లిబస్సు ప్రమాదంలో ఏడుగురు ప్రాణాలు కోల్పోవడం తనను కలిచివేసిందని చంద్రబాబు ఆవేదన చెందారు. గాయపడిన వారికి మెరుగైన వైద్యం అందించాలని... మృతుల కుటుంబాలను ప్రభుత్వం ఆదుకోవాలని కోరారు. వరుస ప్రమాదాలు తీవ్ర ఆవేదన కలిగిస్తున్నాయని చంద్రబాబు అన్నారు.
మృతులకు అశృ నివాళి : లోకేశ్
దర్శి సమీప సాగర్ కాల్వలో ఆర్టీసీ బస్సుపడిన దుర్ఘటనలో ఏడుగురు మృతి సమాచారం తెలిసి తీవ్ర దిగ్భ్రాంతికి గురయ్యానని లోకేశ్ అన్నారు. మృతులకు అశృ నివాళులు అర్పించారు. పొదిలికి చెందిన పెళ్లి బృందానికి జరిగిన ప్రమాదం మాటలకు అందని విషాదమన్నారు. గాయపడిన వారికి మెరుగైన వైద్యం అందించాలన్నారు. మృతుల కుటుంబాలకు ప్రభుత్వం బాసటగా నిలవాలని లోకేశ్ కోరారు.
