Viral Video: ఈ ఆటో డ్రైవర్ మాములోడు కాదు.. వీడియోలో మీరే చూడండి !

పుణె: ఆర్థిక ఇబ్బందులతో ఓ ఆటోరిక్షా డ్రైవర్ గుడిలోని గంటను దొంగిలించిన ఘటన మహారాష్ట్రలోని పుణెలో గల కోంద్వాలో ఉన్న భైరవనాథ్ ఆలయంలో చోటుచేసుకుంది. ఈ ఘటన అక్కడే ఉన్న సీసీటీవీ పుటేజీలో రికార్డు కావడంతో సోషల్ మీడియాలో వైరల్‌గా మారింది. గంటను దొంగిలించే ముందు గుడి బయట అమాయకంగా చేతులు కట్టుకుని ఉన్న సదరు ఆటో డ్రైవర్.. దణ్ణం కూడా పెట్టుకున్నాడు. ఆ తర్వాత గంట మీద కన్నేశాడు. కాసేపటి తర్వాత గంటను దొంగిలించి తన ఆటోలో పెట్టుకుని అక్కడి నుంచి వెళ్లిపోయాడు.

ఆలయ అధికారుల ఫిర్యాదు మేరకు కేసు నమోదు చేసిన పోలీసులు.. సీసీటీవీ పుటేజ్ ఆధారంగా విచారణ చేపట్టారు. లుల్లానర్‌లో ఓ ప్రయాణికుడిని దింపుతుండగా నిందితుడైనా ఆటో రిక్షా డ్రైవర్‌ను అరెస్ట్ చేశారు. దొంగతనం కింద ఇండియన్ పీనల్ కోడ్ (IPC) సెక్షన్ 379 కింద నిందితుడిపై కేసు నమోదు చేశారు. దొంగిలించిన గంటను అతని ఆటోలోనే దాచినట్లు విచారణలో తేలింది. కాగా సదరు డ్రైవర్ నడుపుతున్న ఆటో అద్దెకు తీసుకున్నది కావడం గమనార్హం. ఆటో యజమానిని సంప్రదించగా.. సదరు డ్రైవర్ ఆ ఆటో రిక్షాను అద్దెకు తీసుకున్నట్టు చెప్పాడు. కాగా ఆర్థిక ఇబ్బందులతోనే ఆటో రిక్షా డ్రైవర్ ఈ దొంగతనానికి పాల్పడినట్లు తెలుస్తోంది.