IND Vs AUS: క్రికెట్ అభిమానులకు శుభవార్త.. రేపటి నుంచే టిక్కెట్ విక్రయాలు

వన్డే ప్రపంచకప్‌ క్రికెట్ అభిమానులకు కావాల్సినంత వినోదం అందిస్తోంది. ఇప్పటికే సెమీస్ బెర్తులు ఖరారయ్యాయి. భారత్, దక్షిణాఫ్రికా, ఆస్ట్రేలియా, న్యూజిలాండ్ జట్లు సెమీస్‌లో తలపడనున్నాయి. విశ్వవిజేత ఎవరో తెలియాలంటే మరో మూడు మ్యాచ్‌ల వరకు ఆగాలి. అయితే వన్డే ప్రపంచకప్ పూర్తి కాగానే టీమిండియా బిజిబిజీగా సిరీస్‌లు ఆడాల్సి ఉంది. ఆస్ట్రేలియాతో సొంతగడ్డపై 5 టీ20ల సిరీస్ ఆడనుంది. ఈనెల 23 నుంచి టీ20 సిరీస్ ప్రారంభం అవుతుంది. తొలి మ్యాచ్ మన ఏపీలోనే జరగనుంది. విశాఖ వేదికగా భారత్-ఆస్ట్రేలియా అమీతుమీ తేల్చుకోనున్నాయి. ఈ మ్యాచ్ టిక్కెట్లను ఈనెల 15, 16 తేదీల్లో అందుబాటులో ఉంచనున్నట్లు ఆంధ్రా క్రికెట్ అసోసియేషన్ ప్రకటించింది. పేటీఎం ఇన్‌సైడర్ డాట్ ఇన్ వెబ్‌సైట్ ద్వారా టిక్కెట్లు విక్రయిస్తామని వెల్లడించింది.

మరోవైపు ఆన్‌లైన్‌లోనే కాకుండా ఆఫ్‌లైన్‌లోనూ భారత్-ఆస్ట్రేలియా టిక్కెట్లు విక్రయించనున్నారు. ఈనెల 17, 18న విశాఖలో ప్రత్యేకంగా ఏర్పాటు చేసిన కౌంటర్లలో ఆఫ్‌లైన్ టిక్కెట్లను విక్రయిస్తారు. రూ.600, రూ.1500, రూ.2000, రూ.3000, రూ.3500, రూ.6000 ధరల్లో టిక్కెట్లు అందుబాటులో ఉంటాయని ఆంధ్రా క్రికెట్ అసోసియేషన్ అధికారులు వెల్లడించారు. పీఎం పాలెంలో ఉన్న డాక్టర్‌ వైఎస్ఆర్ ఏసీఏ–వీడీసీఏ క్రికెట్‌ స్టేడియం, వన్‌టౌన్‌ ఇందిర ప్రియదర్శిని మున్సిపల్‌ స్టేడియం, గాజువాక రాజీవ్‌ గాంధీ ఇండోర్‌ స్టేడియంలో ఉదయం 10 గంటల నుంచి ఆఫ్‌లైన్‌లో టికెట్లు అందుబాటులో ఉంటాయని ఏసీఏ కార్యదర్శి ఎస్.ఆర్.గోపీనాథ్‌రెడ్డి తెలిపారు. కాగా ఐదు టీ20ల సిరీస్ కోసం ఇప్పటికే ఆస్ట్రేలియా జట్టును ప్రకటించగా టీమిండియా మాత్రం ఇంకా వెల్లడించలేదు. ఆస్ట్రేలియా జట్టుకు మాథ్యూ వేడ్ సారథ్యం వహించనున్నాడు. మిచెల్ స్టార్క్, ప్యాట్ కమిన్స్ వంటి స్టార్ బౌలర్లు భారత్‌తో టీ20 సిరీస్‌కు దూరంగా ఉంటారని క్రికెట్ ఆస్ట్రేలియా గతంలో వెల్లడించిన విషయం తెలిసిందే.

మరిన్ని క్రీడావార్తల కోసం ఇక్కడ క్లిక్ చేయండి.