Mumbai Indians: రోహిత్ కెప్టెన్సీపై కీలక ప్రకటన.. అవి నమ్మకండి..!!

వచ్చే ఏడాది ఐపీఎల్‌కు సంబంధించి ప్రస్తుతం ముంబై ఇండియన్స్ ఫ్రాంచైజీ గురించే సర్వత్రా చర్చ నడుస్తోంది. ఎందుకంటే సక్సెస్‌ఫుల్ కెప్టెన్ రోహిత్‌ను నాయకత్వ బాధ్యతల నుంచి తప్పించడమే కారణం. గుజరాత్ టైటాన్స్ నుంచి హార్దిక్ పాండ్యను ట్రేడింగ్ చేసుకుని కెప్టెన్సీ అప్పగించడం కూడా దుమారం రేపుతోంది. మరోవైపు సూర్యకుమార్ యాదవ్, జస్‌ప్రీత్ బుమ్రా కూడా ముంబై ఇండియన్స్‌ను వీడుతారని తీవ్రస్థాయిలో ప్రచారం జరుగుతోంది. ఈ నేపథ్యంలో ముంబై ఇండియన్స్ ఫ్రాంచైజీ స్పందించి.. తమ ఆటగాళ్లు ఎవరూ తమ ఫ్రాంచైజీని వీడటం లేదని స్పష్టం చేసింది. సోషల్ మీడియాలో జరుగుతున్న ప్రచారంలో నిజం లేదని.. ఇలాంటి వదంతులను నమ్మవద్దని సూచించింది. అంతేకాకుండా తాము ఇతర ఆటగాళ్లను కూడా కొనుగోలు చేయడం లేదని తెలిపింది.

మరోవైపు రోహిత్ కెప్టెన్సీపై ముంబై ఇండియన్స్ కీలక ప్రకటన చేసింది. తాము రోహిత్‌కు చెప్పే కెప్టెన్సీ నుంచి తొలగించామని.. అతడి గురించి అభిమానులు ఎలాంటి ఆందోళన చెందొద్దని సూచించింది. హార్దిక్‌ను కెప్టెన్‌గా చేయడానికి ముందు కూడా తమ ఆటగాళ్ల అభిప్రాయం తీసుకున్నామని వివరించింది. ప్రతి ఆటగాడి విలువైన సూచనలను తాము పరిగణనలోకి తీసుకున్నట్లు ముంబై ఇండియన్స్ ఫ్రాంచైజీ అధికారి పేర్కొన్నారు. కాగా క్రిక్ బజ్ నివేదిక ప్రకారం.. ఢిల్లీ క్యాపిటల్స్, చెన్నై సూపర్ కింగ్స్ ఫ్రాంచైజీలు రోహిత్‌ను ట్రేడింగ్ చేసుకోవడానికి ముంబై ఫ్రాంచైజీని సంప్రదించాయని తెలుస్తోంది. కానీ ఈ ఆఫర్‌ను ముంబై ఇండియన్స్ తిరస్కరించిందని సమాచారం అందుతోంది. కాగా 2013, 2015, 2017, 2019, 2020 సీజన్‌లలో ముంబై ఇండియన్స్‌ను కెప్టెన్‌గా రోహిత్ శర్మ ఛాంపియన్‌గా నిలిపాడు. 2022లో గుజరాత్ టైటాన్స్‌కు కెప్టెన్ హార్దిక్ పాండ్యా టైటిల్ అందించాడు.

మరిన్ని క్రీడా వార్తల కోసం ఇక్కడ క్లిక్ చేయండి.