PAK Vs BAN: ప్రపంచకప్ మ్యాచ్‌లో పాలస్తీనా జెండాలు.. సోషల్ మీడియాలో వైరల్

వన్డే ప్రపంచకప్ కొన్ని సంచలనాలు, కొన్ని మెరుపులతో రంజుగా సాగుతోంది. అయితే మంగళవారం నాడు కోల్‌కతా వేదికగా ఈడెన్ గార్డెన్స్‌లో పాకిస్థాన్, బంగ్లాదేశ్ మధ్య జరిగిన మ్యాచ్‌లో పాలస్తీనా జెండాలు కనిపించాయి. ప్రస్తుతం పాలస్తీనా-ఇజ్రాయెల్ మధ్య భీకర యుద్ధం జరుగుతోంది. ఈ యుద్ధంలో ఇప్పటి వరకు చాలా మంది ప్రాణాలు కోల్పోగా.. పాలస్తీనా ప్రజలపై ఇంకా ఇజ్రాయెల్ దాడులు కొనసాగుతున్నాయి. ఈ నేపథ్యంలో ఇవాళ్టి మ్యాచ్‌లో పాలస్తీనా జెండాలు కనిపించడం ఆసక్తి రేపింది. ఈ మ్యాచ్‌ను వీక్షించడానికి వచ్చిన కొందరు క్రికెట్ అభిమానులు పాలస్తీనాకు మద్దతు తెలుపుతూ స్టాండ్స్‌లో పాలస్తీనా జెండాలతో కనిపించారు. ఇప్పటికే ఇండియా పాలస్తీనాకు మద్దతు ప్రకటించింది. ఇప్పుడు ప్రపంచం నలుమూలల నుంచి మద్దతు లభిస్తోంది. పాలస్తీనా జెండాలను క్రికెట్ అభిమానులు ప్రదర్శించడం సోషల్ మీడియాలో వైరల్‌గా మారింది.

కాగా ఈడెన్‌‌లో జరిగిన మ్యాచ్‌లో బంగ్లాదేశ్‌పై పాకిస్థాన్ 7 వికెట్ల తేడాతో విజయం సాధించి సెమీస్ ఆశలను సజీవంగా ఉంచుకుంది. బంగ్లాదేశ్ మాత్రం ఈ టోర్నీలో ఆరో పరాజయంతో సెమీస్ రేసు నుంచి నిష్క్రమించింది. ఈ మ్యాచ్‌లో టాస్ గెలిచిన బంగ్లాదేశ్ ముందుగా బౌలింగ్ చేసింది. దీంతో బంగ్లాదేశ్‌ను పాకిస్థాన్ 45.1 ఓవర్లలో 204 పరుగులకు ఆలౌట్ చేసింది. ఆ తర్వాత 205 పరుగుల విజయలక్ష్యంతో పాకిస్థాన్ బరిలోకి దిగగా ఓపెనర్లు రాణించడంతో సులభంగా టార్గెట్ అందుకుంది. 32.3 ఓవర్లలో 3 వికెట్లు మాత్రమే కోల్పోయి 205 పరుగుల టార్గెట్‌ను ఛేదించింది. కాగా ఇదే మైదానంలో నవంబర్ 2న ఇండియా-శ్రీలంక మధ్య మ్యాచ్ జరగనుంది.