IND vs AUS Final: చరిత్ర సృష్టించిన రోహిత్ శర్మ.. 48 ఏళ్ల ప్రపంచకప్ చరిత్రలో..
ABN , First Publish Date - 2023-11-19T15:02:04+05:30 IST
IND vs AUS Final: భారత్, ఆస్ట్రేలియా మధ్య జరుగుతున్న వన్డే ప్రపంచకప్ ఫైనల్ మ్యాచ్‌లో టీమిండియా కెప్టెన్ రోహిత్ శర్మ చరిత్ర సృష్టించాడు. ఈ ప్రపంచకప్‌లో రోహిత్ శర్మ ఇప్పటివరకు 550కిపైగా పరుగులు చేశాడు. దీంతో 48 ఏళ్ల ప్రపంచకప్ చరిత్రలో ఒక ఎడిషన్‌లో అత్యధిక పరుగులు చేసిన కెప్టెన్‌గా హిట్‌మ్యాన్ చరిత్ర సృష్టించాడు.
అహ్మదాబాద్: భారత్, ఆస్ట్రేలియా మధ్య జరుగుతున్న వన్డే ప్రపంచకప్ ఫైనల్ మ్యాచ్‌లో టీమిండియా కెప్టెన్ రోహిత్ శర్మ చరిత్ర సృష్టించాడు. ఈ ప్రపంచకప్‌లో రోహిత్ శర్మ 597కిపైగా పరుగులు చేశాడు. దీంతో 48 ఏళ్ల ప్రపంచకప్ చరిత్రలో ఒక ఎడిషన్‌లో అత్యధిక పరుగులు చేసిన కెప్టెన్‌గా హిట్‌మ్యాన్ చరిత్ర సృష్టించాడు. కాగా ఈ ప్రపంచకప్‌లో కెప్టెన్‌గా బ్యాటర్‌గా దుమ్ములేపుతున్న రోహిత్ పరుగుల వరద పారిస్తున్నాడు. ఇప్పటికే ఓ సెంచరీ, 3 హాఫ్ సెంచరీలు సాధించాడు. ఈ టోర్నీలో ఆడిన 11 మ్యాచ్‌ల్లో రోహిత్ శర్మ 597 పరుగులు చేశాడు. ఈ మ్యాచ్‌లో రోహిత్, గిల్ కలిసి తొలి వికెట్‌కు 30 పరుగులు జోడించారు. దీంతో వన్డే ఫార్మాట్‌లో ఒక క్యాలెండర్ ఇయర్‌లో అత్యధిక పరుగుల భాగస్వామ్యం నెలకొల్పిన రెండో జోడిగా రోహిత్, గిల్ నిలిచారు. ఈ క్రమంలో ఆస్ట్రేలియా ఆటగాళ్లు గిల్‌క్రిస్ట్, వాగ్ కలిసి 1999లో నెలకొల్పిన 1518 పరుగుల భాగస్వామ్యాన్ని రోహిత్, గిల్ అధిగమించారు. ప్రస్తుతం వీరిద్దరి ఖాతాలో 1523 పరుగులున్నాయి. 1998లో 1635 పరుగులుచేసిన సచిన్ టెండూల్కర్, సౌరవ్ గంగూలీ ఈ జాబితాలో మొదటి స్థానంలో ఉన్నారు. అటు విరాట్ కోహ్లీ కూడా ఈ మ్యాచ్‌లో చేసిన పరుగుల ద్వారా వన్డే ప్రపంచకప్ చరిత్రలో అత్యధిక పరుగులు చేసిన బ్యాటర్ల జాబితాలో రెండో స్థానానికి చేరుకున్నాడు.
ప్రతిష్టాత్మక ప్రపంచకప్ ఫైనల్‌లో ఆస్ట్రేలియా టాస్ గెలిచి మొదట బౌలింగ్ ఎంచుకుంది. దీంతో టీమిండియా మొదట బ్యాటింగ్ చేయనుంది. టీమిండియా కెప్టెన్ రోహిత్ శర్మ కాయిన్ వేయగా.. ఆస్ట్రేలియా కెప్టెన్ ప్యాట్ కమిన్స్ హెడ్స్ చెప్పాడు. కాయిన్ హెడ్స్ పడింది. దీంతో టాస్ గెలిచిన కమిన్స్ ముందుగా బౌలింగ్ చేస్తామని చెప్పాడు. కాగా ఈ ఫైనల్ మ్యాచ్‌లు రెండు జట్లు కూడా తమ తుది జట్టులో ఎలాంటి మార్పులు చేయలేదు. సెమీస్‌లో ఆడిన జట్టుతోనే ఆడుతున్నాయి. ఈ టోర్నీలో ఇప్పటివరకు ఒక మ్యాచ్ కూడా ఓడిపోని టీమిండియా వరుసగా 10 విజయాలతో ఫైనల్‌లో అడుగుపెట్టింది. టోర్నీ ఆరంభంలో వరసగా రెండు మ్యాచ్‌ల్లో ఓడిన ఆస్ట్రేలియా ఆ తర్వాత అద్భుతంగా పుంజుకుంది. వరుసగా 8 విజయాలతో ఫైనల్ చేరింది.
తుది జట్లు
భారత్: రోహిత్ శర్మ(కెప్టెన్), శుభ్‌మన్ గిల్, విరాట్ కోహ్లీ, శ్రేయాస్ అయ్యర్, కేఎల్ రాహుల్(వికెట్ కీపర్), సూర్యకుమార్ యాదవ్, రవీంద్ర జడేజా, మహ్మద్ షమీ, జస్ప్రీత్ బుమ్రా, కుల్దీప్ యాదవ్, మహ్మద్ సిరాజ్
ఆస్ట్రేలియా: ట్రావిస్ హెడ్, డేవిడ్ వార్నర్, మిచెల్ మార్ష్, స్టీవెన్ స్మిత్, మార్నస్ లాబుషాగ్నే, గ్లెన్ మాక్స్‌వెల్, జోష్ ఇంగ్లిస్(వికెట్ కీపర్), మిచెల్ స్టార్క్, పాట్ కమిన్స్(కెప్టెన్), ఆడమ్ జంపా, జోష్ హేజిల్‌వుడ్
