WPL 2023: టాస్ ఓడి బ్యాటింగ్ ప్రారంభించిన ఆర్సీబీ.. ఈరోజైనా రాతమారేనా?

నవీముంబై: మహిళల ప్రీమియర్ లీగ్(WPL) లో బోణీ కొట్టేందుకు నానా అవస్థలు పడుతున్న రాయల్ చాలెంజర్స్ బెంగళూరు(RCB) జట్టు ఢిల్లీ కేపిటల్స్‌(Delhi Capitals)తో తలపడుతోంది. డాక్టర్ డీవీ పాటిల్ స్పోర్ట్స్ అకాడమీలో జరుగుతున్న జరుగుతున్న ఈ మ్యాచ్‌లో ఢిల్లీ కేపటిల్స్ టాస్ గెలిచి బెంగళూరుకు బ్యాటింగ్ అప్పగించింది. బెంగళూరు, ఢిల్లీ రెండు జట్లకు ఇది ఐదో మ్యాచ్. ఇప్పటి వరకు ఆడిన నాలుగు మ్యాచుల్లో ఢిల్లీ మూడింటిలో విజయం సాధించి 6 పాయింట్లతో రెండో స్థానంలో కొనసాగుతోంది. స్మృతి మంధాన సారథ్యంలోని రాయల్ చాలెంజర్స్ మాత్రం ఆడిన అన్ని మ్యాచుల్లోనూ ఓడింది. ఫలితంగా అట్టడుగున నిలిచింది.

బెంగళూరు వరస పరాజయాలపై ఇప్పటికే సోషల్ మీడియాలో విమర్శలు వెల్లువెత్తుతున్నాయి. ఇక కెప్టెన్ స్మృతిపై అభిమానులు విరుచుకుపడుతున్నారు. ఆమెను లక్ష్యంగా చేసుకుని అసభ్య కామెంట్లు కూడా చేస్తున్నారు. ఈ మ్యాచ్‌లో విజయం సాధించడం ద్వారా పరువు కాపాడుకోవాలని బెంగళూరు గట్టి పట్టుదలగా ఉంది. కాగా, ఈ మ్యాచ్‌లోనూ కెప్టెన్ స్మృతి మరోమారు దారుణంగా విఫలమైంది. 8 పరుగులు మాత్రమే చేసి అవుటైంది. ప్రస్తుతం 6 ఓవర్లు ముగిశాయి. బెంగళూరు వికెట్ నష్టానికి 29 పరుగుల చేసింది.