BJP List: బీజేపీ అభ్యర్థుల జాబితా.. అంతా గందరగోళం.. అయోమయంలో పార్టీ క్యాడర్

హైదరాబాద్: తెలంగాణ బీజేపీ అభ్యర్థుల చివరి జాబితా (Telangana BJP Final List) ఈరోజు (శుక్రవారం) విడుదలైంది. అయితే బీజేపీ అభ్యర్థుల ఎంపికలో తీవ్ర గందరగోళ పరిస్థితి నెలకొంది. చివరి జాబితాలో వనపర్తి, చాంద్రాయణగుట్ట అభ్యర్థలను హైకమాండ్ మార్చేసింది. వనపర్తిలో‌ అశ్వత్థామరెడ్డి (Aswatthamar Reddy) స్థానంలో‌ అనుజ్ఞా రెడ్డికి (Anujna Reddy).. చాంద్రాయణగుట్టలో సత్యనారాయణ (Satyanarayana) ప్లేస్‌లో మహేందర్‌కు (Mahender) టికెట్ ఇచ్చింది. అలాగే మొదటి లిస్ట్‌లో బెల్లంపల్లి అభ్యర్థిగా శ్రీదేవిని (Sridevi) బీజేపీ ప్రకటించింది. అయితే ఆఖరి జాబితాలో బెల్లంపల్లి సీటుకు శ్రీదేవి స్థానంలో కొయ్యల ఏమాజీ (Koyala Emaji) పేరును ప్రకటించింది. మళ్లీ ఏమైందో తెలియదు కానీ వెంటనే ఏమాజీ స్థానంలో శ్రీదేవినే కొనసాగిస్తున్నట్లు కమలం పార్టీ ప్రెస్‌నోట్‌ను విడుదల చేసింది.

అటు అలంపూర్ బీజేపీ అభ్యర్థిగా మారెమ్మకు (Maremma) బీజేపీ అవకాశమిచ్చింది. అయితే అలంపూర్‌లో మారెమ్మ స్థానంలో‌ బీజేపీ అభ్యర్థిగా రాజగోపాల్ (Rajagopal) ఉంటారని ప్రెస్‌నోట్ ఇచ్చింది. కంటోన్మెంట్ స్థానంలో నామినేషన్ వేయటానికి రెడీగా ఉండాలని మాజీ ఐపీఎస్ కృష్ణప్రసాద్‌కు (Ex-IPS Krishnaprasad) గత రాత్రి తెలంగాణ బీజేపీ చీఫ్ కిషన్‌ రెడ్డి (Telangana BJP Chief) ఫోన్ చేసి చెప్పారు. దీంతో నేడు నామినేషన్ వేయటానికి మాజీ‌ ఐపీఎస్ అన్ని ఏర్పాట్లు చేసుకున్నారు. చివరకు ఈరోజు విడుదలైన చివరి జాబితాలో కంటోన్మెంట్ అభ్యర్థిగా గణేష్ నారాయణ్‌ను (Ganesh Narayana) బీజేపీ ప్రకటించింది. అభ్యర్థుల మార్పుతో బీజేపీ క్యాడర్ అయోమయంలో పడిపోయింది.