Harishrao: ‘మీకు ఇచ్చే మొఖం లేదు తెచ్చే మొఖం లేదు’.. కాంగ్రెస్‌పై హరీష్‌రావు ఫైర్

సిద్దిపేట: ఎన్నికల ప్రచారంలో భాగంగా జగదేవపూర్ మండల కేంద్రంలో బీఆర్‌ఎస్ నిర్వహించిన రోడ్‌షోలో మంత్రి హరీష్‌రావు (Minister Harish Rao) పాల్గొన్నారు. ఈ సందర్భంగా మంత్రి మాట్లాడుతూ.. గుండె మీద చేయి వేసుకొని ఒక్కసారి ఆలోచించండి ఇతర పార్టీ వాళ్లు ఇన్ని రోజులు కనిపించారా అని అడిగారు. కరోనా కాలంలో కూడా తిరిగింది గులాబీ పార్టీ నాయకులని గుర్తుచేశారు. కేసీఅర్ వచ్చినాక గజ్వేల్ విలువ పెరిగి, భూముల రేట్లు పెరిగాయన్నారు. కొందరు వచ్చి ఝుటా మాటలు మాట్లాడుతున్నారని.. ‘‘మీకు ఇచ్చే మొఖం లేదు తెచ్చే మొఖం లేదు’’ అంటూ విరుచుకుపడ్డారు. బీజేపీ పాలిత రాష్ట్రాల్లో కేసీఆర్‌ ఇస్తున్న పెన్షన్ ఇస్తున్నారా అంటూ హరీష్‌రావు ఛాలెంజ్ విసిరారు. మోడీ రాష్ట్రమైన గుజరాత్‌లో ఆరువందల పెన్షన్ ఇస్తుంటే , కర్ణాటకలో కాంగ్రెస్ పార్టీ ఆరు వందల పెన్షన్ ఇస్తుందని.. బీజేపీ వాళ్ళు ఏ మొఖం పెట్టుకొని ఆరు వేలు ఇస్త అని అంటున్నారని మంత్రి ప్రశ్నించారు.

గోదావరి నీళ్లతో గజ్వేల్ ప్రజల కాళ్ళు కడిగిన ఘనత కేసీఆర్‌ దే అని చెప్పుకొచ్చారు. కర్ణాటకలో మూడు గంటల కరెంట్ వస్తది అది కూడా ముప్పై సార్లు వస్తదని ఆ ప్రాంత ప్రజలు అన్నారన్నారు. 24 గంటల కరెంట్ కావాలంటే కారుకు వేయాలని... 3 గంటల కరెంట్ కావాలంటే కాంగ్రెస్‌కు వేయాలన్నారు. బీజేపీ పార్టీ వల్ల ఏదైనా మంచి పని అయిందా అర్థం కాలేదు కానీ ఏ మొఖం పెట్టుకొని వస్తున్నారో అని ఆగ్రహం వ్యక్తం చేశారు. రైతు బందు దండగ అని ఉత్తమ్‌కుమార్ రెడ్డి, రైతు బందు దుబారా అని కాంగ్రెస్ వాళ్ళు అంటున్నారన్నారు. ముచ్చటగా మూడో సారి మన సీఎం కేసీఆర్ ముఖ్యమంత్రి కాబోతున్నారని ధీమా వ్యక్తం చేశారు. ఈటెల రాజేందర్‌కు రాజకీయ భిక్ష పెట్టింది కేసీఆర్ అని హరీష్‌రావు వ్యాఖ్యలు చేశారు. ఈ రోడ్‌‌షోలో ఎమ్మెల్సీ యాదవ రెడ్డి, ఎఫ్‌డీసీ చైర్మన్ వంటేరు ప్రతాప్ రెడ్డి పాల్గొన్నారు.

మరిన్ని పోరు తెలంగాణ వార్తల కోసం ఇక్కడ క్లిక్ చేయండి