Raghunandan Rao: గత ఎన్నికల్లో హరీశ్‌రావును.. ఈ ఎన్నికల్లో కేటీఆర్‌ని పరిగెత్తిస్తాను

సిద్దిపేట: గత ఉప ఎన్నికల్లో ఆరు అడుగుల మంత్రి హరీశ్‌రావును పరిగెత్తించాను.. ఈ ఎన్నికల్లో బుడ్డోడు కేటీఆర్‌ని పరిగెత్తిస్తానని బీజేపీ దుబ్బాక ఎమ్మెల్యే రఘునందన్‌రావు ( Raghunandan Rao ) సెటైర్లు వేశారు. మంగళవారం నాడు దౌల్తాబాద్ రోడ్ షోలో తనపై మంత్రి కేటీఆర్ చేసిన వ్యాఖ్యలపై రఘునందన్‌రావు కౌంటర్ అటాక్ ఇచ్చారు. దౌల్తాబాద్‌లో మంత్రి కేటీఆర్ చేసిన వ్యాఖ్యలను తీవ్రంగా ఖండించారు. ఈ సందర్భంగా రఘునందన్‌రావు మాట్లాడుతూ...‘‘నేను తెలంగాణ ఉద్యమం చేసిన సమయంలో కేటీఆర్ అమెరికాలో ఉన్నాడు. మీరు ఇటుకతో కొడితే నేను రాయితో కొడతా. కేసీఆర్ లేకపోతే కేటీఆర్ తలపైన రూపాయి బిల్లా పెడితే పావులకు కూడా కొనుగోలు చేయరు’’ అని రఘునందన్‌రావు ఎద్దేవచేశారు.

బీజేపీ నాకు సంస్కారం నేర్పించింది

‘‘తెలంగాణ ఉద్యమంలో అమెరికాలో ఉన్న కేటీఆర్ ఉద్యమకారులపై అవాకులు చేవాకులు మాట్లాడుతున్నారు. నాకు తల్లిదండ్రులు, బీజేపీ సంస్కారం నేర్పించింది. మేము ఉద్యమం చేసి తెలంగాణ సాధించాం. గత ఎన్నికల్లో పోలీసులతో ఇబ్బంది పెట్టావు. ఈ ఎన్నికల్లో ఏం చేసుకుంటావో చేసుకో.. ప్రజలు అన్నీ గమనిస్తున్నారు. కేటీఆర్ దమ్ము ధైర్యం ఉంటే దుబ్బాక గడ్డకు వచ్చి డబ్బులు, మందు పంపిణీ చేయనని పోచమ్మ దేవాలయం వద్ద ప్రమాణం చేయాలి. 170 ఓట్లతో గెలిచిన నీకు ( కేటీఆర్ ).. 1000 ఓట్లతో గెలిచిన నాతో నీకు పోలికా....?దౌల్తాబాద్‌లో బహిరంగ సభలో కేటీఆర్ మాట్లాడిన మాటలను వెంటనే వెనక్కి తీసుకోవాలి. సభ్యత సంస్కారం లేకుండా మాట్లాడుతున్నావు’’ అని రఘునందన్‌రావు తీవ్ర ఆగ్రహం వ్యక్తం చేశారు.