BJP MLA: బీజేపీ ఎమ్మెల్యే రాజాసింగ్‌ ఇంట్లో ఆయుధాలు...?

- ట్విటర్‌లో అధికారులకు ఫిర్యాదు చేసిన వ్యక్తి

- నోటీసులు జారీ చేసిన పోలీసులు

మంగళ్‌హాట్‌(హైదరాబాద్), (ఆంధ్రజ్యోతి): ఎన్నికల సమయంలో బీజేపీ ఎమ్మెల్యే రాజాసింగ్‌(BJP MLA Rajasingh) ఆయుధ పూజ చేయడంపై మంగళ్‌హాట్‌ పోలీసులు నోటీసులు జారీ చేశారు. ఇందుకు సంబంధించిన వివరాలు ఇలా ఉన్నాయి... ఇటీవల దసరా పండుగను పురస్కరించుకొని బీజేపీ గోషామహల్‌ అభ్యర్థి రాజాసింగ్‌ తల్వార్లు, గన్స్‌కు మంగళ్‌హాట్‌లోని ఆయన ఇంట్లో ఆయుధపూజలు చేశారు. అందుకు సంబంధించిన ఫొటోలు, వీడియోలు సామాజిక మధ్యమాల్లో వైరలయ్యాయి. ఎన్నికల సమయంలో రాజాసింగ్‌ వద్ద ఆయుధాలు ఉన్నాయని, అతడిపై చట్టపరమైన చర్యలు తీసుకోవాలని ఓ వ్యక్తి ట్విట్టర్‌ ద్వారా పోలీసులకు ఫిర్యాదు చేశాడు. ఫిర్యాదుపై స్పందించిన అధికారులు మంగళవారం రాజాసింగ్‌ను కలిసి నోటీసులు అందజేశారు. ఆయుధాలు ఎక్కడి నుంచి వచ్చాయి, ఎన్నికల సమయంలో తనఇంట్లో ఎందుకు ఉన్నాయనే దానిపై నాలుగు రోజుల్లో వివరాలు ఇవ్వాలని పోలీసులు జారీ చేసిన నోటీసుల్లో పేర్కొన్నారు.