Traffic Diversion Alert : నేడు సీఎం ఇఫ్తార్‌ విందు..ఏఏ ప్రాంతాల్లో ట్రాఫిక్‌ ఆంక్షలంటే..
ABN , First Publish Date - 2023-04-12T11:56:56+05:30 IST
రాత్రి 9 వరకు ఆంక్షలు అమల్లో ఉంటాయన్నారు. వాహనాల పార్కింగ్‌ వివరాలను ఆయన వెల్లడించారు. ట్రాఫిక్‌ మళ్లింపులు, పార్కింగ్‌ ప్రదేశాలు(Parking Places), వాహనాలు వెళ్లాల్సిన మార్గాలను తెలిపే మ్యాప్‌ను విడుదల చేశారు.
హైదరాబాద్: రంజాన్‌ ఉపవాస దీక్షల నేపథ్యంలో ముఖ్యమంత్రి కేసీఆర్‌(Chief Ministers) ఏర్పాటు చేసిన ఇఫ్తార్‌-ఏ-దావత్‌ కార్యక్రమానికి పోలీసులు భారీ బందోబస్తు చర్యలు చేపట్టారు. ఎల్బీ స్టేడియంలో బుధవారం సాయంత్రం నిర్వహించే ఈ విందుకు మంత్రులు, ఎమ్మెల్యేలు, ముస్లిం మతపెద్దలు, పార్టీ కార్యకర్తలతోపాటు నగరంలోని పలు మసీద్‌ల ఇమామ్‌లు, ముస్లిం సోదరులు భారీ సంఖ్యలో హాజరయ్యే అవకాశముంది. స్టేడియం పరిసరాల్లో బుధవారం సాయంత్రం 5 గంటల నుంచే ట్రాఫిక్‌ మళ్లింపులు(Traffic Diversion) చేపట్టనున్నట్లు ట్రాఫిక్‌ అదనపు సీపీ జి.సుధీర్‌బాబు తెలిపారు. రాత్రి 9 వరకు ఆంక్షలు అమల్లో ఉంటాయన్నారు. వాహనాల పార్కింగ్‌ వివరాలను ఆయన వెల్లడించారు. ట్రాఫిక్‌ మళ్లింపులు, పార్కింగ్‌ ప్రదేశాలు(Parking Places), వాహనాలు వెళ్లాల్సిన మార్గాలను తెలిపే మ్యాప్‌ను విడుదల చేశారు.
ట్రాఫిక్‌ మళ్లింపులు ఇలా..
చాపెల్‌రోడ్‌, నాంపల్లి నుంచి బాబూ జగ్జీవన్‌రామ్‌ విగ్రహం వైపు వచ్చే వాహనాలను ఏఆర్‌ పెట్రోల్‌ పంపు వద్ద నుంచి పీసీఆర్‌ (పోలీస్‌ కంట్రోల్‌ రూమ్‌) -వైపు మళ్లిస్తారు.
-ఎస్‌బీఐ, గన్‌ఫౌండ్రీ నుంచి ప్రెస్‌క్లబ్‌, బషీర్‌బాగ్‌ ఫ్లైఓవర్‌ వైపు వెళ్లే వాహనాలను ఎస్‌బీఐ పక్క నుంచి చాపెల్‌ రోడ్‌ వైపు అనుమతిస్తారు.
రవీంద్రభారతి, హిల్‌ఫోర్ట్‌ రోడ్‌ నుంచి బాబూ జగ్జీవన్‌రామ్‌ విగ్రహం వైపు వెళ్లే వాహనాలను కేఎల్‌కే బిల్డింగ్‌ వద్ద నుంచి సుజాత హైస్కూల్‌
వైపు అనుమతిస్తారు.
లిబర్టీ వైపు నుంచి బషీర్‌బాగ్‌ ఫ్లై ఓవర్‌ ద్వారా నేరుగా వెళ్లే వాహనాలను బీజేఆర్‌ విగ్రహం వద్ద కుడివైపు అనుమతినివ్వకుండా గన్‌ఫౌండ్రీ, చాపెల్‌రోడ్‌ వైపు నేరుగా అనుమతిస్తారు.
నారాయణగూడ సెమెటెరీ, ఓల్డ్‌ ఎమ్మెల్యే క్వార్ట ర్స్‌ నుంచి బషీర్‌బాగ్‌ వైపు వచ్చే వాహనాలను ఓల్డ్‌ ఎమ్మెల్యే క్వార్టర్స్‌ వద్ద నుంచి హిమాయత్‌నగర్‌ వై జంక్షన్‌ వైపు అనుమతిస్తారు.
కింగ్‌ కోఠి, బొగ్గులకుంట నుంచి భారతీయ విద్యాభవన్‌ మీదుగా బషీర్‌బాగ్‌ వెళ్లే వాహనాలను కింగ్‌కోఠి క్రాస్‌ రోడ్‌ వద్ద నుంచి తాజ్‌మహల్‌, ఈడెన్‌గార్డెన్‌ వైపు అనుమతినిస్తారు.
బషీర్‌బాగ్‌ నుంచి పీసీఆర్‌ వైపు వెళ్లే వాహనాలను అనుమతించకుండా లిబర్టీ వైపు అనుమతిస్తారు.
సాధారణ వాహనదారులు, దావత్‌ ఏ ఇఫ్తార్‌ కార్యక్రమానికి వచ్చే అతిథులు ట్రాఫిక్‌ మళ్లింపులను దృష్టిలో ఉంచుకోవడంతో పాటు వాహనాల నుంచి దిగాల్సిన ప్రదేశాలు, పార్కింగ్‌ కేంద్రాలను దృష్టిలో పెట్టుకోవాలని సూచించారు.
పార్కింగ్‌ కేంద్రాలు
ఏ-1 గోల్డ్‌ ఆన్‌ డయాస్‌ పాస్‌ ఉన్న వారు ఎల్‌బీస్టేడియం ఏ గేటు ద్వారా ప్రవేశించి గేట్‌ నెం.17 వద్ద దిగాలి. వాహనాలను టెన్నిస్‌ కోర్టు వద్ద పార్క్‌ చేయాలి.
ఏ-1 గోల్డ్‌ రెడ్‌ కలర్‌ టెక్స్ట్‌ ఉన్న వారు ఎల్‌బీస్టేడియం ఏ గేటు ద్వారా ప్రవేశించి మెయిన్‌ రోడ్‌ వద్ద దిగి గేట్‌ నెం.17 ద్వారా ప్రవేశించాలి. వాహనాలను మహబూబియా కాలేజ్‌, ఆలియా కాలేజ్‌, హజ్‌హౌజ్‌లో పార్కింగ్‌ చేయాలి.
ఏ-1 గోల్డ్‌ గ్రీన్‌ కలర్‌ టెక్స్ట్‌ ఉన్న వారు ఎల్‌బీస్టేడియం డి గేటు ద్వారా ప్రవేశించి ఎదురుగా మెయిన్‌ రోడ్‌ వద్ద దిగాలి. వాహనాలను నిజాం కాలేజీ గేట్‌ నెం.2 వద్ద పార్క్‌ చేయాలి.
ఏ-2 గ్రీన్‌ కలర్‌ పాస్‌ ఉన్న వారు ఎల్‌బీస్టేడియం డి గేటు ద్వారా ప్రవేశించి ఎదురుగా మెయిన్‌ రోడ్‌ వద్ద దిగాలి. వాహనాలను నిజాం కాలేజీ గేట్‌ నెం.2 వద్ద పార్క్‌ చేయాలి.
బీ బ్లాక్‌ బ్లూ కలర్‌ పాస్‌ ఉన్న వారు ఎల్‌బీస్టేడియం జి గేటు మెయిన్‌రోడ్దు వద్ద దిగి గేట్‌ నెం. 15 ద్వారా ప్రవేశించాలి. వాహనాలను పబ్లిక్‌ గార్డెన్‌లో పార్క్‌ చేయాలి.
సీ బ్లాక్‌ పింక్‌ కలర్‌ పాస్‌ ఉన్న వారు ఎల్బీ స్టేడియం ఎఫ్‌, ఎఫ్‌1 గేట్‌ వద్ద దిగి గేట్‌ నెం.6, 8 ద్వారా లోనికి వెళ్లాలి. వాహనాలను నిజాం కాలేజీ గేట్‌ నెం.4 వద్ద పార్క్‌ చేయాలి.
మీడియా ప్రతినిధులు డి గేట్‌ ద్వారా లోనికి ప్రవేశించాలి. వాహనాలను ఎస్‌సీఈఆర్‌టీ కార్యాలయం వద్ద పార్క్‌ చేయాలి.
