TS NEWS: బీజేవైఎం నేతలపై మైనంపల్లి అనుచరుల దాడి.. ఈ దాడికి కారణమేంటంటే..?

హైదరాబాద్: ఎమ్మెల్యే మైనంపల్లి హనుమంతరావు(MLA Mainampally Hanumantha Rao) అనుచరులు రాక్ ల్యాండ్ అవెన్యూలో బీభత్సం సృష్టించారు. ఎమ్మెల్యే మైనంపల్లి అనుచరులు భూములు కబ్జా చేశారని ఆరోపిస్తూ బీజేవైఎం నాయకులు మైనంపల్లి కార్యాలయాన్ని ధ్వంసం చేశారు.దీంతో ఒక్కసారిగా ఉద్రిక్త వాతావరణం నెలకొంది. కార్యాలయాన్ని ధ్వంసం చేస్తున్న తరుణంలో ఒక్కసారిగా మైనంపల్లి హనుమంతరావు అనుచరులు అక్కడికి చేరుకొని బీజేవైఎం నాయకులపై దాడికి పాల్పడ్డారు.రాళ్లు కర్రలతో విచక్షణ రహితంగా వారిని పరిగెత్తించి కొట్టారు. మైనంపల్లి అనుచరుల దాడిలో బీజేవైఎం నాయకులకు గాయాలయ్యాయి. రాక్ ల్యాండ్ అవెన్యూలో మైనంపల్లి అనుచరులు కబ్జా చేశారని ఆరోపణల నేపథ్యంలో బీజేవైఎం నాయకులను బాధితులు ఆశ్రయించారు. బీజేవైఎం నాయకులకు మైనంపల్లి అనుచరులకు మధ్య తీవ్ర వాగ్వాదం చోటుచేసుకుని గొడవ ముదిరింది.ఈ ఘర్షణలో అల్వాల్ పోలీసులు మైనంపల్లి వర్గానికి మద్దతుగా నిలిచారని బీజేవైఎం నాయకులు ఆరోపణలు చేశారు. ఈఘటనపై బీజేపీ పార్టీ అధిష్ఠానం తీవ్ర ఆగ్రహం వ్యక్తం చేసింది.