AP Politics: ‘మేము సిద్ధం’ సభలపై.. సజ్జల కీలక వ్యాఖ్యలు

అమరావతి, (తాడేపల్లి): ఇడుపుల పాయ నుంచి ఉత్తరాంధ్ర వరకు సీఎం, వైసీపీ అధినేత వైఎస్ జగన్ రెడ్డి (CM Jagan) బస్ యాత్ర ఉంటుందని ఏపీ ప్రభుత్వ సలహాదారు సజ్జల రామ కృష్ణారెడ్డి (Sajjala Rama Krishna Reddy) అన్నారు. ఈ నెల 27వ తేదీన ఇడుపుల పాయ నుంచి జగన్ బస్ యాత్రను ప్రారంభిస్తారని తెలిపారు. కార్యకర్తలను ఎన్నికలకు సిద్ధం చేయడమే జగన్ లక్ష్యమన్నారు. ఎన్నికల నోటిఫికషన్ వచ్చే వరకు బస్ యాత్ర కొనసాగుతుందని చెప్పారు. 27 నుంచి జగన్ పూర్తిగా జనంలోనే ఉంటారన్నారు. 27 ఉదయం ఇడుపుల పాయలో దివంగత నేత వైఎస్ రాజశేఖర్‌రెడ్డికి నివాళులు అర్పిస్తారని చెప్పారు.

ఆ రోజు సాయంత్రం ప్రొద్దుటూరులో ‘మేము సిద్ధం’ బహిరంగ సభలో వైసీపీ కీలక నేతలు పాల్గొంటారని చెప్పారు. వివిధ వర్గాలు, సామాన్య ప్రజలతో జగన్ సమావేశం అవుతారన్నారు. వైసీపీ 5 ఏళ్ల పాలన, ఫ్యూచర్ ప్రణాళికపై చర్చిస్తారని వివరించారు. ప్రతి పార్లమెంట్ పరిధిలో రెండు అసెంబ్లీ నియోజక వర్గాల్లో ప్రజలతో సమావేశాలు పెట్టేలా ఆలోచన చేస్తున్నామని అన్నారు. 28వ తేదీన నంద్యాల ఎమ్మెల్యే, కర్నూల్ ఎంపీ అభ్యర్థుల తరపున జగన్ ప్రచారం చేస్తారని తెలిపారు. 29వ తేదీన ఎమ్మిగనూరులో ‘మేము సిద్ధం’ భారీ బహిరంగ సభ జరుగుతుందని సజ్జల రామ కృష్ణారెడ్డి పేర్కొన్నారు.

మరిన్ని ఏపీ వార్తల కోసం ఇక్కడ క్లిక్ చేయండి