Model Code of Conduct: కాసేపట్లో దేశవ్యాప్తంగా మోడల్ కోడ్ ఆఫ్ కండక్ట్ అమలు.. ఈ కార్యక్రమాలు, స్కీమ్స్ బంద్?

కాసేపట్లో దేశవ్యాప్తంగా జరగనున్న 2024 లోక్‌సభ ఎన్నికల తేదీలను కేంద్ర ఎన్నికల సంఘం(election commission of india) ప్రకటించనుంది. అయితే ఈ తేదీల ప్రకటనతో దేశవ్యాప్తంగా ప్రవర్తనా నియమావళి(Model Code of Conduct) అమల్లోకి రానుంది. దేశంలో ఎన్నికల ఫలితాలు ప్రకటించే వరకు ఇది అమల్లో ఉంటుంది. రాజ్యాంగంలోని ఆర్టికల్ 324 ప్రకారం పార్లమెంట్, రాష్ట్ర శాసనసభలకు స్వేచ్ఛగా, శాంతియుతంగా ఎన్నికలను నిర్వహించడం కోసం ఎన్నికల సంఘం దీనిని ఏర్పాటు చేస్తుంది. దీనిని రాజకీయ పార్టీలు, అభ్యర్థుల మార్గదర్శకత్వం కోసం ఆయా పార్టీల సమ్మతితో దీనిని తయారు చేశారు.

ఎక్కడ అమలు చేస్తారు?

ఎన్నికల సంఘం(election commission) ఎన్నికల తేదీలను ప్రకటించిన తేదీ నుంచి ఇది అమల్లోకి వస్తుంది. ఎన్నికల ప్రక్రియ పూర్తయ్యి, ఫలితాలు వచ్చే వరకు కొనసాగుతుంది. లోక్‌సభ ఎన్నికల సమయంలో మోడల్ ప్రవర్తనా నియమావళి దేశం మొత్తానికి వర్తిస్తుంది. అసెంబ్లీ ఎన్నికల సమయంలో ఇది మొత్తం రాష్ట్రంలో అమల్లో ఉంటుంది.

మోడల్ కోడ్ ఆఫ్ కండక్ట్ లక్షణాలు ఏంటి?

ఎన్నికల ప్రక్రియలో రాజకీయ పార్టీలు, పోటీ చేసే అభ్యర్థులు, అధికార పార్టీలు ఎలా ప్రవర్తించాలో ఈ నియమావళి చెబుతుంది. ఎన్నికల ప్రక్రియ, సమావేశాలు, ఊరేగింపులు, పోలింగ్ రోజు కార్యకలాపాలు, అధికార పార్టీ పనితీరు కూడా కోడ్ ద్వారా నిర్ణయించబడుతుంది.

నియమాలు ఏంటి?

• ఎన్నికలు ప్రకటించిన తర్వాత మంత్రులు, ఇతర అధికారులు ఎలాంటి ఆర్థిక గ్రాంట్లు, వాగ్దానాలు చేయకూడదు

• ఎన్నికల నిర్వహణతో ప్రత్యక్షంగా లేదా పరోక్షంగా సంబంధం ఉన్న అధికారులు లేదా సిబ్బంది బదిలీలు, పోస్టింగ్‌లపై నిషేధం

• ఏదైనా అధికారి బదిలీ లేదా పోస్టింగ్ అవసరమని భావిస్తే ముందుగా కమిషన్ అనుమతి తీసుకోవాలి

• ఎన్నికల ప్రచారానికి సంబంధించిన పనిలో ప్రభుత్వ యంత్రాంగాన్ని లేదా సిబ్బందిని ఉపయోగించకూడదు

• ఎన్నికల ప్రచార పర్యటనతో అధికారిక పర్యటనను కలపడానికి సంబంధించి ఈ నిబంధన నుంచి ప్రధానికి మినహాయింపు ఉంది

• ఏ పార్టీ లేదా అభ్యర్థి ప్రయోజనాలకు ప్రయోజనం చేకూర్చేందుకు విమానం, వాహనాలు మొదలైన వాటితో సహా అధికారిక వాహనం ఏదీ ఉపయోగించరాదు

• ఈ సమయంలో ప్రింట్, ఎలక్ట్రానిక్ మీడియాలో ప్రభుత్వ ఖర్చుతో పార్టీ విజయాలకు సంబంధించిన ప్రకటనలు, ప్రభుత్వ ప్రజా సంబంధాలు నిషేధం

• కేంద్రం/రాష్ట్ర ప్రభుత్వంలో అధికారంలో ఉన్న పార్టీ సాధించిన విజయాలను ప్రదర్శించే హోర్డింగ్‌లు లేదా ప్రకటనలు ప్రభుత్వ ఖర్చుతో కొనసాగించబడవు

• ఎన్నికల ప్రకటనకు ముందు జారీ చేసిన వర్క్ ఆర్డర్‌కు సంబంధించి ఏదైనా పనులు ప్రారంభించకుంటే, పనులు ప్రారంభించకూడదు, పనులు ప్రారంభించినట్లయితే, దానిని కొనసాగించవచ్చు.

• ఇందిరా ఆవాస్ యోజన పథకం కింద కొత్త నిర్మాణ పనులు ప్రారంభించకూడదు, ఎన్నికలు పూర్తయ్యే వరకు కొత్త లబ్ధిదారులను ఆమోదించవద్దు

• సంపూర్ణ గ్రామీణ రోజ్‌గార్ యోజన (SGRY) కొనసాగుతున్న పనులను కొనసాగించవచ్చు

• ఎన్నికల ప్రకటన తర్వాత జాబ్‌కార్డు హోల్డర్లు పని కోరితే కొనసాగుతున్న పనుల్లో ఉపాధి కల్పించవచ్చు

• ఏదైనా ప్రాజెక్ట్ లేదా స్కీమ్ మొదలైన వాటికి శంకుస్థాపనలు చేయోద్దు

• రోడ్లు నిర్మిస్తామని, తాగునీటి సౌకర్యం కల్పిస్తామని హామీలు వంటివి ప్రకటించొద్దు

• గోధుమలు, ఇతర వ్యవసాయ సంబంధిత ఉత్పత్తులకు కనీస మద్దతు ధరను నిర్ణయించడానికి ఎన్నికల కమిషన్‌ను సంప్రదించవచ్చు

మరిన్ని తాజా వార్తల కోసం ఇక్కడ క్లిక్ చేయండి: Lok Sabha Elections : 2024 లోక్‌సభ ఎన్నికలకు సిద్ధమా.. 2014, 2019 ఎన్నికల్లో ఏం జరిగింది?