ఒవైసీది రజాకార్ల సంతతి: ఫడణవీస్‌

ముంబై, నవంబరు 11: మహారాష్ట్ర ఉప ముఖ్యమంత్రి దేవేంద్ర ఫడణవీస్‌, మజ్లిస్‌ అధ్యక్షుడు అసదుద్దీన్‌ ఒవైసీ మధ్య మాటల యుద్ధం నడుస్తోంది. ఒవైసీది రజాకార్ల సంతతి అని ఫడ్నవీస్‌ తాజాగా విమర్శలు సంధించారు. ‘ఒవైసీ రజాకార్ల వారసుడు. రజాకార్లు మరఠ్వాడా ప్రజలను హింసించారు’ అని అన్నారు. మహారాష్ట్రలో ‘ఓటు జిహాద్‌’ మొదలైందని శనివారం ఫడణవీస్‌ చేసిన వ్యాఖ్యలతో ఈ మాటల యుద్ధానికి తెరలేచింది. ‘ఓటు జిహాద్‌’ను ‘ఓటు ధర్మయుద్ధం’తో ఎదుర్కోవాలని కూడా ఆయన పిలుపునిచ్చారు. దీనికి ఒవైసీ స్పందిస్తూ తమ పూర్వీకులు బ్రిటీషు పాలకులపై జిహాద్‌ చేస్తున్నప్పుడు ఫడణవీస్‌ పూర్వీకులు తెల్లదొరలకు ‘ప్రేమలేఖలు’ రాసేవారని విమర్శించారు.