Ayodhya: వామ్మో.. అయోధ్యలో భక్తులకు తిలకం దిద్దే బాలుడు ఈ రేంజ్‌లో సంపాదిస్తాడా!
ABN , Publish Date - May 07 , 2024 | 07:11 PM
అయోధ్యకు వచ్చే భక్తులకు తిలకం దిద్దే ఓ బాలుడు రోజుకు ఎంత సంపాదిస్తాడో తెలిసి జనాలు షాకైపోతున్నారు. ఇందుకు సంబంధించిన వీడియో వైరల్‌గా మారింది. నేనేమీ డాక్టర్ కంటే తక్కువగా కాదని ధీమాగా చెప్పిన అతడి తీరు జనాలకు విపరీతంగా నచ్చేసింది.
ఇంటర్నెట్ డెస్క్: రామ్‌లల్లాను దర్శించుకునేందుకు దేశవ్యాప్తంగా రామభక్తులు అయోధ్యకు (Ayodhya Ram Mandir) పోటెత్తుతున్నారు. అక్కడ ఆధ్యాత్మిక పర్యాటకం మరింతగా ఊపందుకుంటుందని ఇప్పటికే విశ్లేషకులు వ్యాఖ్యానిస్తున్నారు. ఈ నేపథ్యంలో ప్రస్తుతం నెట్టింట వైరల్ అవుతున్న ఓ వీడియో నెటిజన్లను షాక్‌కు గురిచేస్తోంది. అక్కడ ఓ బాలుడు భక్తులకు తిలకాలు దిద్దుతూ ఎంత సంపాదిస్తున్నాడో తెలిసి జనాలు షాకైపోతున్నారు. అయోధ్య రాములవారి దర్శనం కోసం వెళ్లిన ఓ వ్యక్తి ఆ బాలుడిని పలకరించగా ఈ ఆసక్తికర విషయం వెలుగులోకి వచ్చింది. ఇందుకు సంబంధించిన వీడియో ప్రస్తుతం నెట్టింట వైరల్‌గా (Viral) మారింది .
Viral: వావ్.. 100 ఏళ్ల నాటి మంచం.. 300 కేజీల బరువు.. దీనిపై 8 మంది ఒకేసారి నిద్రించొచ్చు!
వీడియోలో కనిపించిన దాని ప్రకారం, ఆ వ్యక్తి.. తిలకాలు దిద్దే బాలుడిని పలకరించి రోజుకు ఎన్ని గంటలు పనిచేస్తావని అడిగాడు. బాలుడేమో ఉదయం 6 గంటల నుంచి రాత్రి 10 గంటల వరకూ అయోధ్యకు వచ్చే భక్తులకు తిలకాలు దిద్ది డబ్బులు సంపాదిస్తుంటానని చెప్పుకొచ్చాడు. సింధూర తిలకాలు పెట్టినందుకు రోజుకు రూ.వెయ్యి, చందనం దిద్దినందుకు మరో రూ.500 సంపాదిస్తానని అన్నాడు. నిజం చెప్పాలి అని ఆ వ్యక్తి బాలుడిని గట్టిగా అడిగితే అతడు మళ్లీ అదే చెప్పాడు. దీంతో, అతడి నెల సంపాదన ఎంతో అప్పటికప్పుడు లెక్కగట్టాడా భక్తుడు (Boy who applies tilak in ayodhya shocked internet by revealing his earnings).
దేశంలో ఓ సాధారణ డాక్టర్ సంపాదనతో సమానంగా నీ సంపాదన ఉంది తెలుసా? అని ఆ వ్యక్తి బాలుడితో అన్నాడు. దేశంలో జనాలు ఉద్యోగాల వెంట పడుతుంటే బాలుడు అవేమీ లేకుండా సునాయాసంగా అంత మొత్తం సంపాదిస్తున్న విషయాన్ని ప్రస్తావించాడు. అతడు చెప్పేదంతా జాగ్రత్తగా విన్న బాలుడు.. నేనేమైనా డాక్టర్ కంటే తక్కువ అని అనుకున్నావా? అంటూ వెళ్లిపోయాడు. అతడి కాన్ఫిడెన్స్ చూసి అక్కడి వారు షాకైపోయారు. ఇలాంటి చిన్నారులకు చదువుకునే అవకాశం దొరికితే దేశం గర్వించే స్థాయికి ఎదుగుతారని ఆ వ్యక్తి కామెంట్ చేస్తూ బాలుడి వీడియోను నెట్టింట పంచుకున్నాడు. ఇది ప్రస్తుతం తెగ వైరల్ అవుతోంది.
