Miyapur: మాజీ మంత్రి యెర్నేని సీతాదేవి మృతి..

• చంద్రబాబు, కామినేని సంతాపం

కలిదిండి, మియాపూర్‌, మే 27: ఉమ్మడి ఆంధ్రప్రదేశ్‌ రాష్ట్ర మాజీ మంత్రి, పూర్వపు ముదినేపల్లి అసెంబ్లీ నియోజకవర్గ మాజీ ఎమ్మెల్యే, విజయ డెయిరీ డైరెక్టర్‌ యెర్నేని సీతాదేవి (74) ఇక లేరు. హైదరాబాద్‌లోని తన కుమార్తె ఇంటిలో సోమవారం వేకువ జామున గుండెపోటుతో కన్నుమూశారు. ముదినేపల్లి నియోజకవర్గం నుంచి రెండు సార్లు టీడీపీ ఎమ్మెల్యేగా గెలుపొంది ఎన్టీఆర్‌ కేబినెట్‌లో విద్యాశాఖ మంత్రిగా పని చేశారు. ఆమె భర్త, రైతు సమాఖ్య రాష్ట్ర అధ్యక్షుడు యెర్నేని నాగేంద్రనాథ్‌ 2023లో అనారోగ్యంతో మృతి చెందారు. వీరికి ఇద్దరు కుమారులు, కుమార్తె ఉన్నారు. సీతాదేవి మృతి పట్ల టీడీపీ అధినేత చంద్రబాబు, మాజీ మంత్రి కామినేని శ్రీనివాస్‌ సంతాపం వ్యక్తం చేశారు.