Chada Venkat Reddy: పార్లమెంట్ ఎన్నికల్లో కాంగ్రెస్‌ మాకు 5 సీట్లు ఇవ్వాలి

సిద్దిపేట: ఇండియా కూటమిలో సీపీఐ ఉన్నందున తెలంగాణలో వచ్చే పార్లమెంటు ఎన్నికల్లో తమకు 5 సీట్లు ఇవ్వాలని సీపీఐ జాతీయ కార్యవర్గ సభ్యుడు చాడ వెంకటరెడ్డి(Chada Venkat Reddy) అన్నారు. శనివారం నాడు సిద్దిపేట జిల్లా హుస్నాబాద్ పార్టీ కార్యాలయంలో మీడియా సమావేశం నిర్వహించారు. ఈ సందర్భంగా ఆయన మీడియాతో మాట్లాడుతూ... పొత్తు వల్ల సీపీఐ ఓట్లు గంపగుత్తగా కాంగ్రెస్‌కు బదిలీ అవుతాయని తెలిపారు. తెలంగాణలోని కాంగ్రెస్ ప్రభుత్వం గోదావరి కృష్ణ జలాల వినియోగంపై అఖిలపక్షం సమావేశం ఏర్పాటు చేసి చర్చించాలని కోరారు. కేంద్ర ప్రభుత్వంలోని నరేంద్ర మోదీ రాముడు పేరుతో రాజకీయాలు చేస్తున్నారని మండిపడ్డారు. ఇండియా కూటమికి కాంగ్రెస్ పెద్దన్న పాత్ర పోషించాలని, ఇండియా కూటమి బలోపేతమే దేశ భవిష్యత్తుపై ఆధారపడి ఉంటుందని చాడ వెంకటరెడ్డి పేర్కొన్నారు.