Raghunandan Rao: కంఠంలో ప్రాణం ఉన్నంత వరకు మెదక్ ఎంపీగా నేనే గెలుస్తా..

మెదక్: జీవితాన్ని మెదక్(Medak) పార్లమెంట్ నియోజకవర్గ ప్రజలకే అంకితం చేస్తానని ఎంపీ రఘునందన్ రావు(MP Raghunandan Rao) చెప్పారు. మెదక్, సిద్దిపేట, సంగారెడ్డి జిల్లా కేంద్రాల్లో ఎంపీ కార్యాలయాలు ఏర్పాటు చేయనున్నట్లు ఆయన చెప్పారు. జిల్లా పార్టీ కార్యాలయంలో నిర్వహించిన కృతజ్ఞత సభలో ఎంపీ పాల్గొన్నారు. అనంతరం తాజాగా జరిగిన లోక్ సభ ఎన్నికలపై రఘునందర్ రావు ఆసక్తికర వ్యాఖ్యలు చేశారు.

ఈ సందర్భంగా ఎంపీ రఘునందన్ రావు మాట్లాడుతూ.." డబ్బుల వెనకాల రఘునందన్ పరిగెత్తడు. కేసీఆర్, హరీశ్ రావును తెలంగాణ ప్రజలు ఎన్నికల్లో ఊడ్చిపడేశారు. పార్లమెంట్ ఎన్నికల్లో నా కోసం కష్టపడిన మీకోసం స్థానిక సంస్థల్లో మీ వెంట నేను నిలబడతా. స్థానిక సంస్థల ఎన్నికల్లో గెలుపే లక్ష్యంగా కార్యకర్తలందరూ పనిచేయాలి. రూ.200కోట్లు ఖర్చుపెట్టినా నాపై కాంగ్రెస్, బీఆర్ఎస్ వాళ్లు గెలవలేదు. మెదక్‌ పార్లమెంట్ నియోజకవర్గ విజయం చరిత్రాత్మకం. ఆరడుగుల బుల్లెట్టు(హరీశ్ రావు) వచ్చినా, మాజీ ముఖ్యమంత్రి కేసీఆర్ వచ్చి ప్రచారం చేసినా ఏడుపాయల దుర్గమ్మకు బలిచ్చి నన్ను మీరు గెలిపించారు. నా కంఠంలో ప్రాణం ఉన్నంత వరకు మెదక్ ఎంపీగా నేనే గెలుస్తా" అంటూ భావోద్వేగానికి లోనయ్యారు.