Saif Ali Khan : ఇంటి దొంగలే సైఫ్‌పై దాడి చేసుండచ్చని.. పోలీసుల అనుమానం..

బాలీవుడ్ స్టార్ సైఫ్‌ అలీఖాన్‌పై గుర్తుతెలియని దుండగుడు ఇంట్లోకి చొరబడి కత్తితో గాయపరచడం దేశవ్యాప్తంగా చర్చనీయాంశంగా మారింది. దీనిపై వెంటనే దర్యాప్తు చేపట్టిన పోలీసులు సైఫ్ ఇంట్లోని సీసీటీవీ ఫుటేజీలను పరిశీలించి చూశారు. అందులో దాడికి రెండు గంటల ముందు వరకూ ఎవరూ ఇంట్లోకి ప్రవేశించినట్లు రికార్డు కాలేదు. దీంతో ఇది ఇంటి దొంగల పనే అని భావిస్తున్నారు పోలీసులు. సైఫ్‌పై దాడి చేసిన వ్యక్తి కెమెరాలకు చిక్కకుండా తప్పించుకోవడంతో అనుమానాలను మరింత బలపరుస్తోంది. నటుడు ఉంటున్న సొసైటీలోకి కొత్త వ్యక్తులెవరూ వచ్చినట్లు ఎలాంటి ఆధారాలు లభించకపోవడంతో.. దుండగుడు ముందుగానే అక్కడే ఉన్నట్లు పోలీసులు అంచనా వేస్తున్నారు. ఇంట్లో పనిచేసేవారిలో ఒకరే ఈ దాడికి పాల్పడి ఉండవచ్చని విశ్వసిస్తున్నారు.

ముంబైలోని విలాసవంతమైన ప్రాంతమైన బాంద్రాలో నివసిస్తోంది సైఫ్ అలీఖాన్ కుటుంబం. గురువారం తెల్లవారు జామున 2.30 గంటల సమయంలో గుర్తుతెలియని దుండగుడు సైఫ్ అలీఖాన్‌ ఇంట్లోకి చొరబడ్డాడు. దొంగతనానికి యత్నిస్తూ సైఫ్ కుమారుడు జేహ్‌ గదిలోకి దూరడంతో కేర్ టేకర్ గట్టిగా కేకలు వేసింది. దీంతో సైఫ్ అక్కడకు చేరుకోవడంతో ఇద్దరి మధ్య ఘర్షణ జరిగింది. తప్పించుకునే ప్రయత్నంలో భాగంగా సైఫ్ పై కత్తితో దాడి చేసి పారిపోయాడు దుండగుడు. ఆరు చోట్ల కత్తి గాయాలవడంతో వెంటనే కుటుంబసభ్యులు వెంటనే లీలావతి ఆస్పత్రికి తరలించారు.

సైఫ్ దాడిపై వెంటనే పోలీసులకు సమాచారం అందడంతో దర్యాప్తు చేపట్టారు. సీనియర్ పోలీసుల బృందం మొదటగా ఇంట్లో ఉన్న సీసీటీవీ రికార్డులు తనిఖీ చేసి చూడగా.. అందులో ఎలాంటి ఆధారాలు లభ్యం కాలేదు. నిందితుడు గోడ దూకి ఇంటి ఆవరణలోకి దూకినట్లు క్రైం బ్రాంచ్ పోలీసులు అనుమానిస్తున్నారు. ప్రస్తుతం లీలావతి ఆస్పత్రిలో చికిత్స పొందుతున్న సైఫ్ ఆరోగ్య పరిస్థితి సర్జరీ తర్వాత నిలకడగా ఉన్నట్లు వైద్యులు ప్రకటించారు. కాగా, ఈ దాడిలో సైఫ్ ఇంట్లో పనిచేసే మహిళకూ స్వల్ప గాయాలయ్యాయి. ప్రస్తుతం ఆమె పరిస్థితి నిలకడగా ఉన్నట్లు సమాచారం.