Bandi Sanjay: ట్విట్టర్ టిల్లు... డ్రగ్స్ బానిస..కేటీఆర్‌పై సంజయ్ సంచలన వ్యాఖ్యలు

నిర్మల్: మంత్రి కేటీఆర్‌పై బీజేపీ రాష్ట్ర అధ్యక్షులు బండి సంజయ్ (BJP State President Bandi Sanjay) సంచలన వ్యాఖ్యలు చేశారు. ట్విట్టర్ టిల్లు... డ్రగ్స్ బానిస అంటూ విరుచుకుపడ్డారు. నమూనాలిస్తే అంతా నిరూపిస్తానని... రక్త, వెంట్రుక నమూనాలిచ్చే దమ్ముందా? అంటూ సవాల్ విసిరారు. ‘‘నేను తంబాకు తింటానని పచ్చి అబద్దాలు చెప్పినవ్ కదా.... నేను ఏ పరీక్షకైనా సిద్ధం. హైదరాబాద్, బెంగళూరు డ్రగ్ కేసులను రీ ఓపెన్ చేయించాల్సిందే’’ అని పట్టుబడ్డారు. జీ-20 నిర్వహణ సమావేశానికి కేసీఆర్ (Telangana CM KCR) వెళ్లకపోవడం సిగ్గు చేటని మండిపడ్డారు. దేశంలోని అన్ని పార్టీలు, అందరు సీఎంలు వెళ్లినా... కేసీఆర్ ఎందుకు వెళ్లలేదో సమాధానమివ్వాలన్నారు. ఆ సమయంలో బిడ్డను సారా దందా స్కాం నుంచి ఎట్లా కాపాడుకోవాలనే దానిపై లాయర్లతో మంతనాలు చేస్తున్నారని యెద్దేవా చేశారు. అంబేద్కర్ జయంతి, వర్థంతిలకు హాజరుకాని మూర్ఖుడు కేసీఆర్ అని వ్యాఖ్యలు చేశారు. అంబేద్కర్ స్పూర్తితో శక్తివంతమైన దేశంగా మార్చుతున్న గొప్ప నాయకుడు మోదీ అని బండిసంజయ్ కొనియాడారు.