Kodela Sivaram Sensational Comments : పల్నాటి పులి కోడెలతో నడచిన నేను.. పిల్లుల పక్కన నడవను

పల్నాడు : సత్తెనపల్లి మండలం పెద్దమక్కెన గ్రామంలో ఇంటింటికి కోడెల, పల్లె నిద్ర కార్యక్రమాన్ని టీడీపీ నేత కోడెల శివరాం నిర్వహించారు. ఈ సందర్భంగా ఆయన సంచలన వ్యాఖ్యలు చేశారు. పల్నాడు గడ్డ మీద పసుపు జెండా చూడగానే గుర్తొచ్చే నాయకుడు కోడెల శివప్రసాదరావు అన్నారు. తనను ఒంటరి వాడిని చేసి చుట్టుముట్టి ఎన్నో కుట్రలు చేస్తున్నారు. పదవుల కోసం అధికారం కోసం పార్టీలు మారే కుటుంబం తమది కాదన్నారు. కోడెల శివప్రసాదరావు స్థానంలో వేరే వారిని తీసుకొచ్చారని వాపోయారు. అలా తీసుకొచ్చిన వారి వెంట తనను నడవమన్నారని.. కానీ తాను నడవనని కోడెల శివరాం తెలిపారు. పల్నాటి పులి కోడెలతో నడచిన తాను పిల్లుల పక్కన నడిచేది లేదని స్పష్టం చేశారు.

ఇటీవల సత్తెనపల్లి టీడీపీ ఇన్‌చార్జిగా కన్నా లక్ష్మీనారాయణను నియమించి ఈ సారి అసెంబ్లీ టికెట్‌ను ఆయనకే కేటాయిస్తున్నట్టు పార్టీ అధినేత చంద్రబాబు స్పష్టం చేశారు. అప్పటి వరకూ పార్టీ టికెట్‌ను ఆశిస్తున్న కోడెల శివరాం ఒక్కసారిగా అవాక్కయ్యారు. నిజానికి కోడెల శివప్రసాదరావు మరణించినప్పటి నుంచి నియోజకవర్గ బాధ్యతలను కోడెల శివరాం తీసుకున్నారు. ఈ క్రమంలోనే సత్తెనపల్లి టికెట్ తనదేనన్న భావనతో ఆయన ఉన్నారు. కానీ చంద్రబాబు నిర్ణయంతో ఆయన సందిగ్ధంలో పడ్డారు. అప్పటి నుంచి సందర్భం దొరికినప్పుడల్లా ఆయన తాను కన్నాతో కలిసి నడిచేది లేదని చెబుతూనే వస్తున్నారు. నేడు కూడా మరోసారి అదే విషయాన్ని కోడెల శివరాం స్పష్టం చేశారు.