Bengalore: ట్రబుల్ షూటర్ డీకే శివకుమార్‌తో వైఎస్‌ షర్మిల భేటీ

బెంగళూరు: వైఎస్ఆర్‌ తెలంగాణ పార్టీ వ్యవస్థాపకురాలు వైఎస్‌ షర్మిల(YS Sharmila) పలుమార్లు డీకే శివకుమార్‌(DK Shivakumar)ను భేటీ కావడం ప్రత్యేకతను సంతరించుకుంటోంది. తెలంగాణలో ఎన్నికల వేడికి ముందే వైఎస్ఆర్‌ తెలంగాణ పార్టీని కాంగ్రెస్‏లోకి విలీనం చేస్తారనే ప్రచారం రోజురోజుకు పెరుగుతోంది. వీటి వ్యూహం వెనుక ట్రబుల్ షూటర్ డీకే శివకుమార్‌ ఉన్నట్టు తెలుస్తోంది. వైఎస్‌ షర్మిల, డీకే శివకుమార్‌ ఇప్పటికే రెండు మూడుసార్లు భేటీ అయిన విషయం తెలిసిందే. తాజాగా నాలుగైదు రోజులక్రితం కూడా కలసినట్టు ప్రచారం సాగుతోంది. తాజాగా ఢిల్లీ నుంచి ఒకే విమానంలో తెలంగాణ కాంగ్రెస్‌ ఎంపీతో కలసి రావడం, ఆమె పార్టీ విలీనం మరింత ముందుకెళ్లినట్టు తెలుస్తోంది. తెలంగాణలో కర్ణాటక తరహాలోనే గ్యారెంటీ హామీలు ఇవ్వడం, షర్మిల పార్టీని విలీనం చేసుకోవడం ద్వారా మరింతశక్తిని సాధించదలిచారు. ఇలా అన్ని కోణాలలో తెలంగాణలో పాగా వేసేందుకు డీకే శివకుమార్‌ను అధిష్టానం రంగంలోకి దించినట్టు తెలుస్తోంది. తెలంగాణ ఎన్నికల్లో విజయం ద్వారా కర్ణాటకతో కలిపి దక్షిణాది నుంచి ఎక్కువ ఎంపీ స్థానాలు సాధించాలనేది కాంగ్రెస్‌ వ్యూహంగా ఉంది.