India vs Canada: కెనడాకు గట్టి కౌంటర్ ఇచ్చిన భారత్.. ఆ దేశ రాయబారిపై వేటు!.. అసలు ఏం జరిగిందంటే..?

న్యూఢిల్లీ: భారత్, కెనడా మధ్య ఉద్రిక్తత వాతావరణం మరింత ముదిరింది. కెనడాలోని భారత దౌత్యవేత్తపై ఆ దేశం బహిష్కరణ వేటు వేసిన సంగతి తెలిసిందే. అయితే కెనడా ఈ నిర్ణయం తీసుకున్న కొన్ని గంటల్లోనే ఆ దేశానికి భారత్ గట్టి కౌంటర్ ఇచ్చింది. తాజాగా మన దేశంలోని కెనడా రాయబారిని భారత్ బహిష్కరించింది. అంతేకాకుండా కెనడా దౌత్యవేత్త 5 రోజుల్లోగా భారతదేశం విడిచి వెళ్లిపోవాలని స్పష్టం చేసింది. మన దేశంలోని కెనడియన్ హైకమీషనర్, కెమెరూన్ మాకేను న్యూఢిల్లీ పిలిపించి విషయం అతనికి చెప్పారు. "భారతదేశంలోని కెనడా హైకమిషనర్‌ను ఈ రోజు పిలిపించాం. భారతదేశంలో ఉన్న ఒక సీనియర్ కెనడా దౌత్యవేత్తను బహిష్కరించాలని భారత ప్రభుత్వం తీసుకున్న నిర్ణయం గురించి అతనికి తెలియజేయడం జరిగింది" అని విదేశాంగ మంత్రిత్వ శాఖ నుంచి ఒక ప్రకటన విడుదలైంది. కామెరూన్ మాకే విదేశాంగ మంత్రిత్వశాఖ కార్యాలయం నుంచి బయటికి వెళ్తున్న వీడియో ఒకటి బయటికి వచ్చింది. ఆ వీడియోలో కామెరూన్ మాకే మీడియాతో మాట్లాదేందుకు నిరాకరించారు. "సంబంధిత దౌత్యవేత్తను వచ్చే ఐదు రోజుల్లోగా భారతదేశం విడిచిపెట్టి వెళ్లిపోవాల్సిందిగా స్పష్టం చేశాం. కెనడియన్ దౌత్యవేత్తలు మన అంతర్గత విషయాలలో జోక్యం చేసుకోవడం, భారతదేశ వ్యతిరేక కార్యకలాపాలకు పాల్పడుతున్న కారణంగా ఆ దౌత్యవేత్తను బహిష్కరిస్తున్నాం" అని విదేశాంగ శాఖ తన ప్రకటనలో పేర్కొంది.

అసలు ఏం జరిగిందంటే.. ఖలీస్థానీ ఉగ్రవాదిని హతమార్చడంలో తమ పాత్ర ఉందని కెనడా ప్రధాని జస్టిన్ ట్రూడో చేసిన ఆరోపణలను భారత్ నేడు ఉదయం ఖండించిన సంగతి తెలిసిందే. ఇంతలోనే కెనడా రాయబారిపై కూడా వేటు వేసింది. కాగా ఈ ఏడాది జూన్‌లో ఖలీస్థాన్ మద్దతారుడు, భారత ప్రభుత్వం ఉగ్రవాదిగా గుర్తించిన హర్దీప్ సింగ్ నిజ్జర్ కెనడాలో దారుణ హత్యకు గురయ్యాడు. సర్రేలోని గురుద్వారా సమీపంలో గుర్తు తెలియని వ్యక్తులు హర్దీప్ సింగ్ నిజ్జర్‌ను కాల్చిచంపారు. దీంతో కెనడా ప్రధాని జస్టిన్ ట్రూడో ఆ దేశ పార్లమెంట్ వేదికగా భారత్‌పై సంచలన ఆరోపణలు చేశారు. ఈ హత్యకు భారతదేశానికి సంబంధం ఉందని తమకు సమాచారం ఉందంటూ వ్యాఖ్యానించారు. తమ దేశ పౌరుడైన హర్దీప్ సింగ్ నిజ్జర్‌ను కెనడాలోనే హత్య చేయడాన్ని తమ సార్వభౌమత్వంపై జరిగిన దాడిగా ఆయన చెప్పుకొచ్చారు. కెనడా విదేశాంగ మంత్రి కూడా భారత్‌పై ఆరోపణలు చేశారు. అంతటితో ఆగకుండా కెనడాలోని భారత దౌత్యవేత్తపై బహిష్కరణ వేటు వేశారు.

దీంతో కెనడా ఆరోపణలపై భారత్ స్పందించింది. కెనడా ఆరోపణలను ఖండిస్తూ భారత విదేశాంగ శాఖ ఒక ప్రకటన విడుదల చేసింది. ‘‘కెనడా ప్రధానమంత్రి వారి పార్లమెంటులో చేసిన ప్రకటనను, వారి విదేశాంగ మంత్రి ప్రకటనను కూడా మేము చూశాము. కెనడా ఆరోపణలను ఖండిస్తున్నాం. కెనడాలో జరిగిన హింసాత్మక చర్యలో భారత్ ప్రభుత్వం ప్రమేయం ఉందనే ఆరోపణలు అసంబద్ధమైనవి. మనది చట్టబద్ధమైన పాలన పట్ల బలమైన నిబద్ధత కలిగిన ప్రజాస్వామ్యం. ఇటువంటి నిరాధారమైన ఆరోపణలు కెనడాలో ఆశ్రయం పొందిన ఖలిస్తానీ ఉగ్రవాదులు, తీవ్రవాదుల నుంచి దృష్టి మరల్చడానికి ప్రయత్నిస్తాయి. భారతదేశ సార్వభౌమాధికారం, ప్రాదేశిక సమగ్రతకు ముప్పు తెస్తాయి. ఈ విషయంపై కెనడియన్ ప్రభుత్వం నిష్క్రియాత్మక వైఖరి చాలా కాలంగా నిరంతర ఆందోళనకు గురి చేస్తోంది. కెనడా రాజకీయ ప్రముఖులు బహిరంగంగా ఇలాంటి అంశాల పట్ల సానుభూతి వ్యక్తం చేయడం తీవ్ర ఆందోళన కలిగించే అంశం. హత్యలు, మానవ అక్రమ రవాణా, వ్యవస్థీకృత నేరాలతో సహా అనేక చట్టవిరుద్ధ కార్యకలాపాలకు కెనడాలో స్థలం ఇవ్వడం కొత్తది కాదు. అటువంటి పరిణామాలకు భారత ప్రభుత్వాన్ని అనుసంధానించే ప్రయత్నాలను మేము తిరస్కరించాము. కెనడా ప్రభుత్వం తమ గడ్డపై పని చేస్తున్న అన్ని భారత్ వ్యతిరేక అంశాలకు వ్యతిరేకంగా సత్వర, సమర్థవంతమైన చట్టపరమైన చర్య తీసుకోవాలని మేము కోరుతున్నాము.’’ అని పేర్కొంది.