CBN Arrest : చంద్రబాబు అరెస్ట్‌పై స్పందించిన ఉక్కు మహిళ షర్మిల

టీడీపీ అధినేత, మాజీ ముఖ్యమంత్రి నారా చంద్రబాబు అక్రమ అరెస్టుపై దేశ విదేశాల ప్రముఖులు పెద్ద ఎత్తున స్పందిస్తున్నారు. బాబు లాంటి సీనియర్ నేతను, తెలుగు రాష్ట్రాలను తన విజనరీతో అభివృద్ధి చేసిన నేతను.. జగన్ ప్రభుత్వం అక్రమంగా కేసులు బనాయించి అరెస్ట్ చేయడాన్ని సినీ, రాజకీయ ప్రముఖులు.. పలు రంగాల పెద్దలు తీవ్రంగా ఖండిస్తున్నారు. తాజాగా.. మణిపుర్ (Manipur) ఉక్కుమహిళ ఇరోమ్ చాను షర్మిల (Irom Chanu Sharmila) ఓ వీడియో రూపంలో స్పందించారు.

బాబును అరెస్ట్ చేయడమా..?

‘చంద్రబాబు బాబు దార్శనికత కలిగిన నేత. ప్రజా నాయకుడిగా ఎంతో ఖ్యాతిని గడించారు. అలాంటి నేతను అక్రమంగా నిర్బంధించడాన్ని నాతో పాటు ప్రతి ఒక్కరూ ఖండించాల్సిందే. దేశంలోని రాజకీయ నేతల అవినీతికి వ్యతిరేకంగా సహేతుకమైన దర్యాప్తు జరిగితే.. ఈడీ అంతవరకూ ఒక్క బీజేపీ నేతపై కూడా నేరం ఎందుకు మోపలేదు..?. తెలుగు రాష్ట్రాల అభివృద్ధికి బాటలు వేసిన నేత చంద్రబాబు. ఇదంతా తన రాజకీయ ప్రత్యర్థులను నిర్వీర్యం చేసేందుకు మోదీనే చేయిస్తున్నారని స్పష్టమవుతోంది. ప్రజా నేతలను ఆయన అలా అవినీతి ముద్ర వేసి అణిచివేయకూడదు. ఒక్కరిద్దరు కాదు ఎంతోమంది రాజకీయ ఖైదీలుగా ఏళ్ల తరబడి జైళ్లలో మగ్గుతున్నారు. మోదీ ప్రజాస్వామ్యం, మానవ హక్కులను గౌరవించి వారందరిని విడుదల చేయాలి’ అని బాబు సేవలను షర్మిల కొనియాడారు. ఈ వీడియోను టీడీపీ తన అధికారిక ట్విట్టర్‌లో షేర్ చేసింది. ఈ వీడియోను వేలాది మంది చూడగా.. పెద్ద ఎత్తున నెటిజన్లు కామెంట్స్ చేస్తున్నారు.