TAUK: టాక్ 'లండన్-చేనేత బతుకమ్మ-దసరా' వేడుకల పోస్టర్ ఆవిష్కరించిన ఎమ్మెల్సీ కవిత

అక్టోబర్ 21న వెస్ట్ లండన్‌లో వేడుకలు: అధ్యక్షుడు రత్నాకర్ కడుదుల

TAUK: తెలంగాణ అసోసియేషన్ ఆఫ్ యునైటెడ్ కింగ్డమ్ (TAUK- టాక్) ఆద్వర్యంలో అక్టోబర్ 21 న నిర్వహిస్తున్న 'లండన్ - చేనేత బతుకమ్మ - దసరా' వేడుకల పోస్టర్‌ని ఎమ్మెల్సీ కవిత హైదరాబాద్‌లో ఆవిష్కరించారు. తెలంగాణ రాష్ట్ర ప్రభుత్వం చేనేతకు చేయూతనివ్వడానికి చేస్తున్న కార్యక్రమాల స్పూర్తితో గత కొన్ని సంవత్సరాలుగా 'టాక్' జరిపే బతుకమ్మ వేడుకలను 'చేనేత బతుకమ్మ'గా నిర్వహిస్తున్నామని నిర్వాహకులు తెలిపారు. వీలైనంత వరకు ప్రవాసులల్లో చేనేతపై అవగాహన కలిపించి, వీలైనన్ని సందర్భాల్లో చేనేత వస్త్రాలు ధరించి నేత కుటుంబాలకు అండగా నిలవాలని కోరుతున్నామని అన్నారు. చేనేత పేరుతో బతుకమ్మ వేడుకల్ని నిర్వహించడం వినూత్నంగా ఉందని, వీరి ప్రయత్నం ఫలించి నేత కుటుంబాలకు మేలు జరగాలని కోరుతూ కవిత శుభాకాంక్షలు తెలియజేశారు.

'టాక్' అధ్యక్షుడు రత్నాకర్ కడుదుల ఫోన్ ద్వారా మీడియాకి తమ సందేశాన్ని అందజేశారు. టాక్ సంస్థ ఆవిర్భావం నుండి నేటి వరకు అన్ని సందర్భాలలో కవిత ప్రోత్సాహం చాలా గొప్పదని పేర్కొన్నారు. నేటి 'చేనేత బతుకమ్మ' పోస్టర్ ఆవిష్కరించి అలాగే ఆశీర్వదించి మాలో నూతన ఉత్సాహాన్ని నింపిన కవితకి ప్రత్యేక కృతఙ్ఞతలు తెలియజేస్తున్నట్టు చెప్పారు. అన్నివేళలా వారి సూచనలు సలహాలు మాకెంతో ప్రోత్సహాన్ని కలిగిస్తున్నాయని తెలిపారు. చేనేత కుటుంబాల సంక్షేమం పట్ల వారికి ఎంతో శ్రద్ధ ఉందని, ఇటువంటి కార్యక్రమాల వల్ల వారికి వీలైనంత చేయూత అందితే చాలా సంతోషమని కవిత తెలిపారు. యూకేలో నివసించే ప్రవాస ఆడబిడ్డలంతా వేడుకల్లో పాల్గొని, మన సంస్కృతిని విశ్వవ్యాప్తం చేద్దామన్నారు. ఈ సంవత్సరం అక్టోబర్ 21న సాయంకాలాన మన ఊర్లో జరిగినట్టు వేడుకులు నిర్వహిస్తున్నామని తెలిపారు. ప్రవాసులంతా సాయంత్రం 4 గంటల నుండి వెస్ట్ లండన్‌లోని లంప్టోన్ స్కూల్ (Lampton School, Lampton Avenue, Hounslow,TW3 4EP) ఆడిటోరియంలో జరిగే వేడుకలకు విచ్చేయాలని పిలుపునిచ్చారు. వీలైతే చేనేత దుస్తులు ధరించి వేడుకల్లో పాల్గొనాలని అన్నారు. మనమంతా చేనేతకు అండగా నిలవాల్సిన చారిత్రాత్మక సమయమిదని తెలిపారు. మరిన్ని వివరాలకు www.tauk.org.uk వెబ్‌సైట్‌ను సందర్శించాలన్నారు.

రాష్ట్ర ప్రభుత్వం కూడా తెలంగాణ ఆడబిడ్డలకు బతుకమ్మ కానుకగా చేనేత చీరలను అందిస్తున్న విషయాన్ని గుర్తు చేశారు. మనమంతా ముఖ్యమంత్రి కేసీఆర్ ఆశయాలకు అనుగుణంగా ప్రపంచవ్యాప్తంగా నిర్వహిస్తున్న అన్ని బతుకమ్మ వేడుకల్లో, చేనేతకు ప్రాధాన్యతనిస్తూ, చేనేత దుస్తులతో వేడుకలను జరుపుకుంటే, చేనేత కుటుంబాలలో గొప్ప భరోసా వస్తుందని తెలిపారు. ఈ పోస్టర్ ఆవిష్కరణలో పాల్గొన్న మాజీ ఎమ్మెల్సీ వీ. గంగాధర్ గౌడ్, టాక్ వ్యవస్థాపకులు తెలంగాణ రాష్ట్ర చలనచిత్రాభివృది సంస్థ (ఎఫ్‌డీసీ) చైర్మన్ అనిల్ కూర్మాచలం, తెలంగాణ రాష్ట్ర ఫుడ్స్ కార్పొరేషన్ చైర్మన్ మేడే రాజీవ్ సాగర్‌, తెలంగాణ సామాజిక కార్యకర్తలు తిరుమందాస్ నరేష్ గౌడ్, బత్తిని వినయ్, నాగరాజు, అలాగే ఈ కార్యక్రమానికి సహకరించిన కవిత సిబ్బందికి టాక్ సంస్థ ప్రత్యేక కృతఙ్ఞతలు తెలిపింది.