Etela Rajender: ఈటల ఇంటి దగ్గర ఇప్పుడిదే హాట్ టాపిక్..!

హైదరాబాద్: తెలంగాణ బీజేపీలో అసంతృప్తి జ్వాలలు చెలరేగుతున్నాయి. ఇప్పటికే పలువురు సీనియర్లు తమ అసంతృప్తిని వెళ్లిబుచ్చగా.. అదే బాటలో మరి కొందరు ఉన్నట్లు తెలుస్తోంది. తాజాగా ఈటల రాజేందర్ ప్రధాన అనుచరుడు.. బీజేపీ సీనియర్ నేత ఏనుగు రవీందర్‌రెడ్డి అదే కోవలో ఉన్నట్లు చర్చ నడుస్తోంది.

ఏనుగు రవీందర్‌రెడ్డి (Enugu Ravinder Reddy) బీఆర్ఎస్ పార్టీ ఆవిర్భావం నుంచి క్రియాశీలకంగా పని చేశారు. ఈ తర్వాత ఈటల రాజేందర్‌‌ (Etela Rajender)తో కలిసి పార్టీని వీడి బీజేపీ (BJP) లో చేరారు. అప్పటి నుంచీ ఈటలతోనే మైత్రీ కొనసాగుతోంది. ఈటల ఎక్కడుంటే అక్కడే కనిపించేవారు. అంతగా ఈటలతో రవీందర్‌రెడ్డి ప్రయాణం సాగింది. అలాంటిది ఈటల రాజేందర్‌కు బీజేపీ అధిష్టానం కీలక పదవి కట్టబెట్టిన తరుణంలో కనీసం రవీందర్‌రెడ్డి శుభాకాంక్షలు కూడా చెప్పలేదు. నిన్నటి నుంచీ ఈటల నివాసం దగ్గర ఆయన అభిమానులు, కార్యకర్తలు పెద్ద ఎత్తున ఈటలకు విషెస్ చెబుతున్నారు. కానీ ఏనుగు రవీందర్‌రెడ్డి మాత్రం అడ్రస్ లేరు. ఇప్పుడు ఇదే ఈటల నివాసం దగ్గర పెద్ద హాట్ టాఫిక్‌గా మారింది.

ఏనుగు రవీందర్‌రెడ్డి ఎక్కడా? అంటూ ఈటల ఇంటికి వచ్చినవారంతా గుసగుసలాడుతున్నారు. ఈటలతో పాటు బీఆర్ఎస్ నుంచి బయటకు వచ్చిన మరో నేత తుల ఉమ మాత్రం ఈటలకు శుభాకాంక్షలు తెలిపారు. రవీందర్‌రెడ్డి మాత్రం కనిపించకపోవడంతో ఆయన పార్టీ మారబోతున్నారంటూ చర్చ నడుస్తోంది. బీజేపీ వైఖరి పట్ల ఆయన కొంత కాలం నుంచి అసంతృప్తిగా ఉన్నారని వార్తలు వినిపిస్తున్నాయి. ఈ నేపథ్యంలో ఆయన బీజేపీని వీడనున్నట్లు వార్తలు షీకార్లు చేస్తున్నాయి. ఇప్పటికే రవీందర్‌రెడ్డితో కాంగ్రెస్ నేతలు (Congress) మంతనాలు జరిపినట్లు సమాచారం అందుతోంది. త్వరలోనే ఆయన హస్తం గూటికి చేరనున్నట్లు తెలుస్తోంది.