Avanthi Srinivas: ఈ సారి అక్కడి నుంచే పోటీకి దిగుతా

విశాఖపట్నం: రాబోయే ఎన్నికల్లో మళ్లీ భీమిలి నుంచే పోటీ చేస్తానని.. ఆ నియోజకవర్గంలో తాను గెలవడం ఖాయమని ఎమ్మెల్యే అవంతి శ్రీనివాస్(Avanthi Srinivas) తెలిపారు. గతంలో రెండు సార్లు కూడా భీమిలి నుంచే పోటీ చేశానని గుర్తుచేశారు. భీమిలీలో వైసీపీ జెండా ఎగురవేయడం ఖాయమని ఆశాభావం వ్యక్తం చేశారు. శుక్రవారం నాడు విశాఖలోని 6వ వార్డులో సుమారు రూ.2 కోట్లతో స్పోర్ట్స్ థీమ్ పార్కును ప్రారంభించారు. ఈ సందర్భంగా ఆయన మీడియాతో మాట్లాడుతూ.. వారం రోజులు గడవక ముందే యోగ థీమ్ పార్క్‌ను ప్రారంభించినట్లు తెలిపారు. అతి కొద్ది రోజుల్లోనే బటర్ ఫ్లై పార్క్‌ను ప్రారంభించబోతున్నామని వివరించారు. కరోనా వచ్చిన తర్వాత ప్రజలకు ఫిట్‌నెస్ విలువ తెలిసిందన్నారు. కొన్ని వందల కోట్లు రూపాయలు వార్డు అభివృద్ధి కోసం ఖర్చు చేశానని తెలిపారు. విశాఖను విశ్వ నగరంగా తీర్చిదిద్దడమే జగన్ లక్ష్యమని ఎమ్మెల్యే అవంతి శ్రీనివాస్ అన్నారు.