2న విచారణకు రాహుల్‌ రావాలి: యూపీ కోర్టు
ABN , Publish Date - Jun 27 , 2024 | 04:33 AM
పరువు నష్టం దావాలో వచ్చే నెల రెండో తేదీన విచారణకు వ్యక్తిగతంగా హాజరు కావాలని స్థానిక ఎంపీ/ఎమ్మెల్యేల ప్రత్యేక కోర్టు కాంగ్రెస్‌ నాయకుడు రాహుల్‌ గాంధీని ఆదేశించింది.
సుల్తాన్‌పూర్‌ (యూపీ), జూన్‌ 26: పరువు నష్టం దావాలో వచ్చే నెల రెండో తేదీన విచారణకు వ్యక్తిగతంగా హాజరు కావాలని స్థానిక ఎంపీ/ఎమ్మెల్యేల ప్రత్యేక కోర్టు కాంగ్రెస్‌ నాయకుడు రాహుల్‌ గాంధీని ఆదేశించింది. కేంద్ర మంత్రి అమిత్‌ షాపై అభ్యంతరకరమైన వ్యాఖ్యలు చేశారంటూ బీజేపీ నాయకుడు విజయ్‌ మిశ్ర 2018లో ఈ దావా వేశారు.
బుధవారం ఈ కేసు విచారణకు రాగా ఇందులో తనను పార్టీగా చేర్చుకోవాలంటూ రామ్‌ ప్రతాప్‌ అనే వ్యక్తి కోర్టును అభ్యర్థించారు. ఇందుకు ఫిర్యాదుదారు తరఫు న్యాయవాది అభ్యంతరం తెలిపారు. ఆయన బాధితుడు కాడని, ఈ కేసులో ఆయనకు సంబంధమేమీ లేదని చెప్పారు. రాహుల్‌ తరఫు న్యాయవాది కూడా అభ్యంతరం చెప్పారు. వాదనలు విన్న జడ్జి రామ్‌ ప్రతాప్‌ పిటిషన్‌ను తిరస్కరించారు. రాహుల్‌ మాత్రం విచారణకు హాజరు కావాలని ఆదేశించారు. ఫిబ్రవరి 20న కూడా రాహుల్‌ కోర్టుకు వచ్చారు.
