Mohammed Siraj: ఫ్రెండ్ పెళ్లిలో మస్తు ఎంజాయ్ చేసిన టీమిండియా స్టార్ బౌలర్

హైదరాబాద్: టీమిండియా స్టార్ పేసర్ మహ్మద్ సిరాజ్ సెలవులను సరదాగా గడుపుతున్నాడు. విజయవంతమైన సౌతాఫ్రికా పర్యటన తర్వాత లభించిన కొద్ది రోజుల విరామాన్ని స్నేహితులు, బంధువులతో కలిసి ఎంజాయ్ చేస్తున్నాడు. ఈ క్రమంలో తన సొంత నగరమైన హైదరాబాద్‌లో స్నేహితుడి పెళ్లికి సిరాజ్ హాజరయ్యాడు. ఆ పెళ్లిలో ఏర్పాటు చేసిన ఖవ్వాలీలో సిరాజ్ స్నేహితులతో కలిసి ఆనందంగా గడిపాడు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. వైరల్‌గా మారిన వీడియోలో వివాహానికి వచ్చిన స్నేహితులు, అతిథులతో కలిసి సిరాజ్ ఖవ్వాలీ కచేరిని వినడాన్ని చూడొచ్చు. ఆ కార్యక్రమంలో సిరాజ్ చాలా ఎంజాయ్ చేస్తున్నాడు. ఖవ్వాలీ కార్యక్రమంలో పాటలు పాడుతున్న గాయకుడిపై కొందరు డబ్బులు విసురుతూ హంగామా చేశారు.

కాగా ఇటీవల ముగిసిన సౌతాఫ్రికా పర్యటనలో సిరాజ్ అదరగొట్టాడు. కేప్‌టౌన్ వేదికగా జరిగిన రెండో టెస్టు మ్యాచ్‌లో అయితే విశ్వరూపం చూపించాడు. తొలి ఇన్నింగ్స్‌లో 6 వికెట్లతో దుమ్ములేపడంతో అతిథ్య సౌతాఫ్రికా జట్టు 55 పరుగులకే కుప్పకూలింది. సిరాజ్, బుమ్రా విజృంభణతో స్వల్ప స్కోర్లు నమోదైన కేప్‌టౌన్ టెస్ట్‌లో సౌతాఫ్రికాపై టీమిండియా 7 వికెట్ల తేడాతో ఘనవిజయం సాధించింది. ఈ విజయంతో 2 మ్యాచ్‌ల టెస్ట్ సిరీస్‌ను 1-1తో డ్రా చేసుకుంది. 2019లో భారత జట్టులోకి అడుగుపెట్టిన హైదరాబాద్ ఆటగాడు మహ్మద్ సిరాజ్ తక్కువ కాలంలోనే జట్టులో కీలక ఆటగాడిగా మారాడు. అన్ని ఫార్మాట్లలో జట్టులో సుస్థిర స్థానాన్ని దక్కించుకున్నాడు. ఇప్పటివరకు 23 టెస్టులాడిన సిరాజ్ 68 వికెట్లు తీశాడు. 41 వన్డేల్లో 68 వికెట్లు, 10 టీ20ల్లో 12 వికెట్లు తీశాడు.