TS Politics: సీఎం రేవంత్‌ అందుకే విషం చిమ్ముతున్నారు: హరీష్ రావు

హైదరాబాద్: సీఎం రేవంత్ రెడ్డి(CM Revanth Reddy)పై మాజీ మంత్రి హరీష్ రావు(Harish Rao) తీవ్ర ఆగ్రహం వ్యక్తం చేశారు. కేఆర్ఎంబీ(KRMB)కు కాంగ్రెస్ ప్రభుత్వం ప్రాజెక్టులను అప్పగించడంతో తెలంగాణకు తీవ్ర అన్యాయం జరుగుతుందని మండిపడ్డారు. తెలంగాణలో ప్రాజెక్టులను కేఆర్ఎంబీ(KRMB)కు అప్పగించింది ముమ్మాటికీ కాంగ్రెస్సే అని అన్నారు. రేవంత్‌కు విషయం తెలియకుండా విషం చిమ్ముతున్నాడని ధ్వజమెత్తారు. తెలంగాణ భవన్‌లో ఆదివారం నాడు ఆయన మీడియాతో మాట్లాడుతూ... కేసీఆర్ ఏనాడూ కూడా ఆ ప్రాజెక్టులను కేఆర్ఎంబీకు అప్పగించలేదని తేల్చిచెప్పారు.

కాంగ్రెస్ ఆ బిల్లు తీసుకురాలేదా..?

నీటి ప్రాజెక్టులను అప్పనంగా కేఆర్ఎంబీకు అప్పగించింది కాంగ్రెస్ అని చెప్పారు. రేవంత్ రెడ్డికి అవగాహన లేకుండా విమర్శలు చేస్తున్నారన్నారు. కేఆర్ఎంబీకు అప్పగించాలని ఆనాటి కాంగ్రెస్ ప్రభుత్వం బిల్లు పెట్టిందని గుర్తుచేశారు. జైపాల్ రెడ్డి, జైరాం రమేష్ వీరిద్దరూ కూడా బిల్లు తీసుకొచ్చారన్నారు. రేవంత్ రెడ్డి అతి తెలివి బంద్ చేయాలని హెచ్చరించారు. కేఆర్ఎంబీకు అప్పగించడం వల్ల హైదరాబాద్ తాగు నీరు, ఖమ్మం, నల్లగొండకు సాగు నీరు రావడం కష్టమైందని తెలిపారు. పోతిరెడ్డిపాడుపై రేవంత్ రెడ్డి టీడీపీలో ఉన్నప్పుడు ఒక్క మాట కూడా మాట్లాడలేదని.. ఇప్పుడు మాట్లాడడం విస్మయాన్ని కలిగిస్తోందన్నారు. అసెంబ్లీలో నీటి సమస్యలపై చర్చించడానికి తాము సిద్ధమేనని హరీశ్ రావు సీఎం రేవంత్‌కు సవాల్ విసిరారు.