Harish Rao: మంత్రి కోమటిరెడ్డి పోకడులను ప్రజాస్వామ్య వాదులు తీవ్రంగా ప్రతిఘటించాలి

యాదాద్రి-భువనగిరి: ప్రజాస్వామ్య వాదులంతా మంత్రి కోమటిరెడ్డి వెంకటరెడ్డి(Minister Komati Reddy Venkata Reddy) పోకడులను తీవ్రంగా ప్రతిఘటించాలని మాజీ మంత్రి, ఎమ్మెల్యే హరీష్ రావు(Harish Rao) అన్నారు. సోమవారం నాడు జిల్లా పరిషత్ సమావేశంలో జెడ్పీ చైర్మన్ ఎలిమినేటి సందీప్ రెడ్డిని మంత్రి కోమటిరెడ్డి అవమానించడాన్ని హరీశ్‌రావు ఎక్స్ వేదికగా ఖండించారు. కాంగ్రెస్ ప్రజాపాలనలో సాటి ప్రజాప్రతినిధులను అవమానపరుస్తున్న మంత్రుల వైఖరి గర్హనీయమని హరీష్ రావు అన్నారు.

యాదాద్రి భువనగిరి జెడ్పీచైర్మన్ సందీప్ రెడ్డిపై అధికారిక కార్యక్రమంలో అకారణంగా దుర్భాష లాడటం కాంగ్రెస్ నియంతృత్వ పోకడలకు నిదర్శనమని చెప్పారు. మంత్రి తాను మాట్లాడింది చాలదన్నట్టు.. పోలీసులకు హుకుం జారీ చేసి బలవంతంగా సందీప్ రెడ్డిని బయటకు పంపించారని మండిపడ్డారు. కోమటి రెడ్డికి ప్రజాస్వామ్యం మీద ఏ మాత్రం నమ్మకమున్నా జిల్లా పరిషత్ చైర్మన్ సందీప్ రెడ్డికి తక్షణమే క్షమాపణ చెప్పాలని హరీష్ రావు డిమాండ్ చేశారు.