Assistant Professor: త్వరలోనే 607 అసిస్టెంట్‌ ప్రొఫెసర్‌ పోస్టుల భర్తీ

హైదరాబాద్‌, జూలై 10 (ఆంధ్రజ్యోతి) : రాష్ట్ర వ్యాప్తంగా ప్రభుత్వ వైద్య కళాశాలల్లో ఖాళీగా ఉన్న 607 అసిస్టెంట్‌ ప్రొఫెసర్‌ పోస్టుల భర్తీకి నేడో, రేపో మెడికల్‌ రిక్రూట్‌మెంట్‌ బోర్డు నోటిఫికేషన్‌ జారీ చేయనుంది. కొత్తగా ఏర్పాటు చేయబోతున్న 8 వైద్య కళాశాలలకే 200 మంది అసిస్టెంట్‌ ప్రొఫెసర్లు అవసరం. దీంతో ఆ వైద్య కళాశాలల్లోని ఖాళీల భర్తీపైనా సర్కారు దృష్టి సారించింది. విద్యా సంవత్సరం మొదలయ్యేలోగా అన్ని ఖాళీలను భర్తీ చేయాలని ఆరోగ్యశాఖను ఆదేశించింది. ప్రభుత్వ వైద్య కళాశాలల్లోని 607 ఖాళీల భర్తీకి అనుమతి ఇచ్చింది. ఈ పోస్టులన్నిటిని వైద్య, ఆరోగ్య సర్వీసుల రిక్రూట్‌మెంట్‌ బోర్డు ద్వారా భర్తీ చేయనున్నారు.

కాగా, ప్రజారోగ్య సంచాలకుల పరిఽధిలోని ఆస్పత్రుల్లో 435 ఎంబీబీఎ్‌స(సివిల్‌ అసిస్టెంట్‌ సర్జన్‌)పోస్టుల భర్తీకి ఇటీవల మెడికల్‌ రిక్రూట్‌మెంట్‌ బోర్డు నోటిఫికేషన్‌ విడుదల చేసిన సంగతి తెలిసిందే. ఆ నోటిఫికేషన్‌కు బుధవారం ఉదయం వరకు 2400 దరఖాస్తులొచ్చినట్లు ఉన్నతాధికారులు తెలిపారు. గురువారం సాయంత్రానికి దరఖాస్తుల గడువు ముగియనుంది. చివరి రోజు మరో వెయ్యి దరఖాస్తుల వరకూ వస్తాయని అధికారులు అంచనా వేస్తున్నారు.