Nakka Anand Babu: జైళ్లో ఉన్న చంద్రబాబు సమాచారం సజ్జలకు ఎలా తెలుస్తుంది

అమరావతి: రాజమండ్రి సెంట్రల్ జైలుకు తాడేపల్లి ప్యాలెస్ నియంత్రిస్తోoదని ప్రభుత్వ సలహాదారు సజ్జల రామకృష్ణారెడ్డి వ్యాఖ్యలతో మరోసారి స్పష్టమైందని టీడీపీ పొలిట్ బ్యూరో సభ్యులు నక్కా ఆనంద్ బాబు(Nakka Anand Babu) పేర్కొన్నారు. శుక్రవారం నాడు టీడీపీ పార్టీ కార్యాలయంలో ఆయన మీడియాతో మాట్లాడుతూ..‘‘చంద్రబాబు ప్రాణాలకు ముప్పు ఉందని మేం చెప్తోంది నిజమేనన్నట్లుగా సజ్జల మాట్లాడాడు. తాడేపల్లి ప్యాలెస్ జైలును నియంత్రించకుంటే, చంద్రబాబు విషయాలు సజ్జలకు ఎలా తెలుస్తాయి? చంద్రబాబు క్షేమంగా బయటకు రాకుండా తన నాయకత్వంలో బృందం పనిచేస్తోందని సజ్జల చెప్పాడు. జైల్లో అసలు వాస్తవాలను సజ్జల సమాధి చేస్తున్నట్లు స్పష్టమవుతోంది. చంద్రబాబు ఆరోగ్యం గురించి ప్రజలు పడే ఆందోళనను కూడా జగన్మోహన్‌రెడ్డి తట్టుకోలేడు. జగన్మోహన్‌రెడ్డి బుద్ధి తెలుసు కాబట్టే చంద్రబాబుకి అందే వైద్యం గురించి వందశాతం అనుమానాలు ఉన్నాయి. సొంత బాబాయ్‌ని హతమార్చి, తల్లి, చెల్లిని తరిమేసిన చరిత్ర జగన్మోహన్‌రెడ్డికి ఉంది. చంద్రబాబుకి ఇంటి నుంచి వచ్చే భోజనాన్ని పరీక్షిస్తున్నామని సజ్జల చెప్పాడు. ఇంటి భోజనం పరీక్ష పేరుతో విషప్రయోగం చేయట్లేదనే గ్యారంటీ ఏంటి? వినాశకాలే విపరీత బుద్ధి అన్నట్లుగా వైసీపీ నేతలు చంద్రబాబు ఆరోగ్యంపై వెటకారo చేస్తున్నారు. తన అత్తగారి ఇళ్లుగా భావించిన చంచలగూడా జైలును జగన్మోహన్‌రెడ్డి పేకాట క్లబ్‌గా మార్చలేదా? సకల సౌకర్యాలతో నెల రోజుల వ్యవధిలో 250వరకూ ములాఖత్‌లు జగన్మోహన్‌రెడ్డికి లభించలేదా’’ అని నక్కా ఆనంద్‌బాబు తీవ్ర ఆగ్రహం వ్యక్తం చేశారు.