Venigandla Ramu : ఈ రోజు యావత్ తెలుగు జాతికి శుభదినం

కృష్ణాజిల్లా (గుడివాడ): స్కిల్ డెవలప్‌మెంట్ కేసు ( Skill Development Case)లో 53 రోజుల తర్వాత మాజీ ముఖ్యమంత్రి, టీడీపీ అధినేత నారా చంద్రబాబు నాయుడి ( Nara Chandrababu Naidu ) కి బెయిల్ లభించింది. అనారోగ్య కారణాల రీత్యా బెయిల్ మంజూరు చేస్తూ ఏపీ హైకోర్టు ( AP High Court ) ఈ మేరకు ఆదేశాలిచ్చింది. చంద్రబాబుకు బెయిల్ రావడంతో ఈరోజు యావత్ తెలుగు జాతికి శుభదినమని టీడీపీ సీనియర్ నేత వెనిగండ్ల రాము ( Venigandla Ramu ) అన్నారు. మంగళవారం నాడు చంద్రబాబుకు బెయిల్ మంజూరు కావడంతో వెనిగండ్ల రాము ఆధ్వర్యంలో గుడివాడలో ఆ పార్టీ నేతలు సంబురాలు చేసుకున్నారు. బైపాస్ రోడ్డులో టపాసులు కాలుస్తూ, జై చంద్రబాబు అంటూ పార్టీ శ్రేణులు నినాదాలు చేశారు. ఈ సందర్భంగా వెనిగండ్ల రాము మాట్లాడుతూ...‘‘చంద్రబాబు బెయిల్ కోసం కృషి చేసిన ప్రతి ఒక్కరికి ధన్యవాదాలు. జగన్‌రెడ్డి ప్రభుత్వం చేస్తున్న కుట్రలను తిప్పికొట్టిన న్యాయవాదులకు హ్యాట్సాఫ్. చంద్రబాబుని హింసించిన పాపం, సీఎం జగన్మోహన్‌రెడ్డి, ఆ పార్టీ నేతలకు తగులుతుంది. ఇది ఆరంభం మాత్రమే. చంద్రబాబు బయటకు రావడంతో టీడీపీ నేతలు ఆత్మస్థైర్యం కొండంత పెరిగింది. తామేంటో చూపిస్తాం. అరాచక వైసీపీ ప్రభుత్వం సిద్ధంగా ఉండాలి’’ అని వెనిగండ్ల రాము అన్నారు.