IND vs ENG: టాస్ గెలిచిన ఇంగ్లండ్.. టీమిండియా తుది జట్టు ఎలా ఉందంటే..?
ABN , First Publish Date - 2023-10-29T13:45:57+05:30 IST
వన్డే ప్రపంచకప్ 2023లో భాగంగా భారత్‌తో మ్యాచ్‌లో డిఫెండింగ్ ఛాంపియన్ ఇంగ్లండ్ టాస్ గెలిచి మొదట ఫీల్డింగ్ ఎంచుకుంది. టీమిండియా కెప్టెన్ రోహిత్ శర్మ కాయిన్ వేయగా ఇంగ్లండ్ కెప్టెన్ జోస్ బట్లర్ హెడ్స్ చెప్పాడు.
లక్నో: వన్డే ప్రపంచకప్ 2023లో భాగంగా భారత్‌తో మ్యాచ్‌లో డిఫెండింగ్ ఛాంపియన్ ఇంగ్లండ్ టాస్ గెలిచి మొదట ఫీల్డింగ్ ఎంచుకుంది. టీమిండియా కెప్టెన్ రోహిత్ శర్మ కాయిన్ వేయగా ఇంగ్లండ్ కెప్టెన్ జోస్ బట్లర్ హెడ్స్ చెప్పాడు. కాయిన్ హెడ్స్ పడింది. దీంతో టాస్ గెలిచిన బట్లర్ ముందుగా బౌలింగ్ చేస్తామని చెప్పాడు. దీంతో ఈ టోర్నీలో టీమిండియా తొలిసారి మొదట బ్యాటింగ్ చేయనుంది. ఈ మ్యాచ్‌లో ఇంగ్లండ్ తమ తుది జట్టులో ఎలాంటి మార్పులు లేకుండా బరిలోకి దిగుతోంది. అటు భారత్ కూడా తమ తుది జట్టులో ఎలాంటి మార్పులు చేయలేదు. న్యూజిలాండ్‌తో ఆడిన జట్టుతోనే ఈ మ్యాచ్‌లోనూ బరిలోకి దిగుతున్నట్టు రోహిత్ శర్మ చెప్పాడు. ఈ ప్రపంచకప్‌లో ఇప్పటివరకు 5 మ్యాచ్‌లాడిన టీమిండియా ఒక్క మ్యాచ్ కూడా ఓడిపోలేదు. అన్నింట్లో విజయం సాధించిన భారత్ ఖాతాలో 10 పాయింట్లు ఉన్నాయి. ప్రస్తుతం పాయింట్ల పట్టికలో టీమిండియా రెండో స్థానంలో ఉంది. ఈ ప్రపంచకప్‌లో ఇప్పటివరకు ఒక మ్యాచ్ కూడా ఓడిపోని ఒకే ఒక జట్టు భారత్ మాత్రమే కావడం గమనార్హం. ఇక ఈ టోర్నీలో ఇప్పటివరకు 5 మ్యాచ్‌లాడిన డిఫెండింగ్ ఛాంపియన్ ఇంగ్లండ్ ఒకే ఒక మ్యాచ్ గెలిచింది. కేవలం రెండు పాయింట్లతో ప్రస్తుతం పాయింట్ల పట్టికలో చిట్ట చివరన 10వ స్థానంలో ఉంది.
తుది జట్లు
భారత్: రోహిత్ శర్మ (కెప్టెన్), శుభ్‌మన్ గిల్, విరాట్ కోహ్లీ, శ్రేయాస్ అయ్యర్, కెఎల్ రాహుల్ (వికెట్ కీపర్), సూర్యకుమార్ యాదవ్, రవీంద్ర జడేజా, కుల్దీప్ యాదవ్, మహ్మద్ షమీ, జస్ప్రీత్ బుమ్రా, మహ్మద్ సిరాజ్
ఇంగ్లండ్: జానీ బెయిర్‌స్టో, డేవిడ్ మలన్, జో రూట్, బెన్ స్టోక్స్, జోస్ బట్లర్(వికెట్ కీపర్/కెప్టెన్), లియామ్ లివింగ్‌స్టోన్, మొయిన్ అలీ, క్రిస్ వోక్స్, డేవిడ్ విల్లీ, ఆదిల్ రషీద్, మార్క్ వుడ్
కెప్టెన్‌గా రోహిత్ శర్మకు 100వ మ్యాచ్
ఇక కెప్టెన్‌గా రోహిత్ శర్మకు ఇది 100వ మ్యాచ్. ఈ మ్యాచ్ ముందువరకు అంతర్జాతీయ క్రికెట్‌లో అన్ని ఫార్మాట్లలో కలిపి భారత జట్టుకు రోహిత్ శర్మ 99 మ్యాచ్‌ల్లో కెప్టెన్‌గా వ్యవహరించాడు. అత్యధికంగా 51 టీ20 మ్యాచ్‌ల్లో కెప్టెన్సీ చేశాడు. ఆ తర్వాత 39 వన్డే మ్యాచ్‌ల్లో, 9 టెస్టు మ్యాచ్‌ల్లో రోహిత్ నాయకత్వం వహించాడు. మొట్టమొదటి సారిగా 2017లో కెప్టెన్‌గా బాధ్యతలు చేపట్టాడు. హిట్‌మ్యాన్ కెప్టెన్సీలో టీమిండియా ఏకంగా 73 మ్యాచ్‌ల్లో విజయం సాధించింది. విజయాల శాతంగా 73గా ఉండడం విశేషం. 23 మ్యాచ్‌ల్లో మాత్రమే ఓడిపోగా.. 3 మ్యాచ్‌లు డ్రాగా ముగిశాయి. రోహిత్ శర్మ కెప్టెన్సీలో టీమిండియా రెండు సార్లు ఆసియా కప్ కూడా గెలిచింది. ఇక ఇంగ్లండ్‌తో జరుగుతున్న ఈ మ్యాచ్ ద్వారా రోహిత్ శర్మ కెప్టెన్‌గా 100 మ్యాచ్‌లు పూర్తి చేసుకున్నాడు. తద్వారా ఈ ఘనత సాధించిన 7వ భారత కెప్టెన్‌గా నిలవనున్నాడు. మొత్తంగా 49వ కెప్టెన్‌గా ఘనత వహించనున్నాడు. కాగా రోహిత్ కంటే ముందు ఈ ఘనతను ఆరుగురు భారత కెప్టెన్లు సాధించారు. వారిలో మాజీ కెప్టెన్లు మహేంద్ర సింగ్(332), మహ్మద్ అజారుద్దీన్(221), విరాట్ కోహ్లీ(213), సౌరవ్ గంగూలీ(196), కపిల్ దేవ్(108), రాహుల్ ద్రావిడ్(104) ఉన్నారు.
గత రికార్డులు
రెండు జట్ల మధ్య గత హెడ్ టూ హెడ్ రికార్డుల విషయానికొస్తే భారత్, ఇంగ్లండ్ వన్డే ప్రపంచకప్ చరిత్రలో ఇప్పటివరకు 8 సార్లు తలపడ్డాయి. ఈ పోటీలో ఇంగ్లండ్‌దే కాస్త పై చేయిగా ఉంది. ఇంగ్లీష్ జట్టు 4 సార్లు గెలవగా.. భారత్ 3 సార్లు గెలిచింది. రెండు జట్ల మధ్య భారత్ వేదికగా 2011 ప్రపంచకప్‌లో జరిగిన మ్యాచ్ టైగా ముగిసంది. రెండు జట్ల మధ్య పోటీలో ఇరు జట్లది అత్యధిక స్కోర్ 338 కావడం గమనార్హం. 2011లో టైగా ముగిసిన మ్యాచ్‌లో రెండు జట్లు ఈ స్కోర్ సాధించాయి. అయితే రెండు జట్ల మధ్య గత ప్రపంచకప్‌లో జరిగిన పోటీలో టీమిండియా 31 పరుగుల తేడాతో ఓడిపోయింది. మొత్తంగా రెండు జట్లు వన్డే ఫార్మాట్లో ఇప్పటివరకు 106 మ్యాచ్‌ల్లో తలపడ్డాయి. ఇందులో టీమిండియా అధిపత్యం చెలాయించింది. భారత జట్టు అత్యధికంగా 57 మ్యాచ్‌ల్లో గెలవగా.. ఇంగ్లండ్ 44 మ్యాచ్‌ల్లో గెలిచింది. రెండు మ్యాచ్‌లు టై కాగా.. 3 మ్యాచ్‌లు రద్దయ్యాయి.
