World Cup: ప్రపంచకప్‌లో విరాట్ కోహ్లీ రికార్డును బ్రేక్ చేసిన రోహిత్ శర్మ

లక్నో: సొంతగడ్డపై జరుగుతున్న వన్డే ప్రపంచకప్‌లో టీమిండియా కెప్టెన్ రోహిత్ శర్మ చెలరేగుతున్నాడు. ఇటు బ్యాటర్‌గా, అటు కెప్టెన్‌గా జట్టును ముందుండి నడిపిస్తున్నాడు. జట్టు విజయాల్లో కీలకపాత్ర పోషిస్తున్నాడు. ఓపెనర్‌గా టీమిండియాకు మంచి ఆరంభాలనిస్తున్న రోహిత్ శర్మ పవర్ ప్లేలో టీ20 స్టైలులో చెలరేగుతున్నాడు. పవర్‌ప్లేలోనే వీలైనన్నీ ఎక్కువ పరుగులు రాబట్టి ప్రత్యర్థులను ఒత్తిడిలోకి నెడుతున్నాడు. ఈ ప్రపంచకప్‌లో ఆస్ట్రేలియాతో జరిగిన మొదటి మ్యాచ్‌లో మినహా మిగతా అన్ని మ్యాచ్‌ల్లో హిట్‌మ్యాన్ అదరగొట్టాడు. ప్రస్తుతం భారత్ తరఫున అత్యధిక పరుగులు చేసిన బ్యాటర్‌గా కూడా ఉన్నాడు. ఇక తన కెప్టెన్సీ నైపుణ్యంతో జట్టును అద్భుతంగా నడిపిస్తున్నాడు. కీలక సమయాల్లో బౌలింగ్‌లో, ఫీల్డింగ్‌లో రోహిత్ చేస్తున్న మార్పులు జట్టుకు మంచి ఫలితాలను అందిస్తున్నాయి. ఆదివారం డిఫెండింగ్ ఛాంపియన్ ఇంగ్లండ్‌తో జరిగిన మ్యాచ్‌లోనూ రోహిత్ అదరగొట్టాడు. బౌలింగ్ పిచ్‌పై రెండు జట్ల బ్యాటర్లు దారుణంగా విఫలమైనప్పటికీ హిట్‌మ్యాన్ మాత్రం చెలరేగాడు. 87 పరుగుల భారీ ఇన్నింగ్స్ ఆడి టీమిండియా మంచి స్కోర్ సాధించడంలో కీలకపాత్ర పోషించాడు.

ఈ క్రమంలో రోహిత్ పలు రికార్డులను అందుకున్నాడు. ముఖ్యంగా స్టార్ బ్యాటర్ విరాట్ కోహ్లీ రికార్డును రోహిత్ శర్మ బ్రేక్ చేశాడు. ఈ మ్యాచ్‌లో చేసిన హాఫ్ సెంచరీ వన్డే ప్రపంచకప్ చరిత్రలో రోహిత్ శర్మకు 12వ 50+ స్కోర్ కావడం గమనార్హం. ఇందులో 7 సెంచరీలు ఉండగా.. 5 హాఫ్ సెంచరీలున్నాయి. దీంతో వన్డే ప్రపంచకప్ చరిత్రలో అత్యధిక సార్లు 50+ పరుగులు సాధించిన ఆటగాళ్ల జాబితాలో రెండో స్థానానికి చేరుకున్నాడు. కాగా విరాట్ కోహ్లీ కూడా 12 సార్లు 50+ స్కోర్లు సాధించాడు. కానీ కోహ్లీ కన్నా తక్కువ ఇన్నింగ్స్‌ల్లోనే రోహిత్ ఈ మార్కు అందుకున్నాడు. కోహ్లీ 32 ఇన్నింగ్స్‌ల్లో 12 సార్లు 50+ స్కోర్లు సాధించగా.. రోహిత్ 23 ఇన్నింగ్స్‌ల్లోనే 12 సార్లు 50+ స్కోర్లు అందుకున్నాడు. ఇక ఈ జాబితాలో భారత క్రికెట్ దిగ్గజం సచిన్ టెండూల్కర్ మొదటి స్థానంలో ఉన్నాడు. సచిన్ 44 ఇన్నింగ్స్‌ల్లో 21 సార్లు 50+ స్కోర్లు సాధించాడు. అలాగే ఈ ఇన్నింగ్స్ ద్వారానే అంతర్జాతీయ క్రికెట్‌లో రోహిత్ శర్మ 18 వేల పరుగులను పూర్తి చేసుకున్నాడు. ఓ వన్డే ప్రపంచకప్‌లో అత్యధిక సిక్సులు కొట్టిన కెప్టెన్‌గా కూడా నిలిచాడు. వన్డే ఫార్మాట్‌లో ఈ ఏడాది వెయ్యి పరుగులు సైతం పూర్తి చేసుకున్నాడు. దీంతో వన్డేల్లో ఈ ఏడాది వెయ్యి పరుగులు చేసిన మొదటి కెప్టెన్‌గా నిలిచాడు.