BandiSanjay Challenge: నీకు దమ్ముంటే అన్ని స్థానాల్లో పోటీ చెయ్ అసద్‌...

కరీంనగర్: ఎంఐఎం పార్టీ అధినేత అసదుద్దీన్ ఓవైసీపై (MIM Leader Asaduddin owaisi) బీజేపీ రాష్ట్ర అధ్యక్షులు బండి సంజయ్ (BJP Leader Bandi Sanjay) తీవ్రస్థాయిలో విరుచుకుపడ్డారు. బుధవారం మీడియాతో మాట్లాడుతూ.. ముస్లింల జీవితాల్ని ఎంఐఎం (MIM) నాశనం చేస్తోందని మండిపడ్డారు. బీఆర్‌ఎస్‌ను (BRS) అధికారంలోకి తేవాలని ఎంఐఎం చూస్తోందన్నారు. ఎవరు అధికారంలో ఉంటే వాళ్ళ మో చేతి నీళ్లు తాగడం ఎంఐఎంకు అలవాటే అని దుయ్యబట్టారు. ‘‘నీకు దమ్ముంటే తెలంగాణలో అన్ని స్థానాల్లో పోటీ చెయ్. ముస్లిం సమాజం ఎంఐఎంను చీదరించుకుంటోంది. నీ తమ్ముని మాటలపై స్పందించు అసద్. నీ ఆస్పత్రిలో పని చేసే వ్యక్తి ఉగ్రవాద సంస్థకు నాయకుడు. నీకు దమ్ముంటే.. మొగాళ్లు అయితే.. పోటీ చెయ్.. మేం సింగిల్‌గా వస్తాం. అమిత్ షా ఇల్లు పేల్చాలని ఎంఐఎం నేతలు చెప్తారేమో’’ అంటూ వ్యాఖ్యలు చేశారు. పార్టీలో చర్చించి పాదయాత్రపై నిర్ణయం తీసుకుంటామన్నారు. బస్సు యాత్రనా.. పాదయాత్రనా చర్చిస్తామని బండి సంజయ్ వెల్లడించారు.

ఈరోజు ఉదయం జిల్లాలోని శ్రీ వెంకటేశ్వర స్వామి ఆలయ భూమి పూజ కార్యక్రమంలో బండి సంజయ్ పాల్గొన్నారు. టీటీడీ (TTD) ఆధ్వర్యంలో వెంకన్న ఆలయం కట్టడం తమ అదృష్టమన్నారు. ఆలయాలకు రాజకీయాలకు సంబంధం లేదని స్పష్టం చేశారు. ఆలయాన్ని నిర్మిస్తున్న టీటీడీకి ఎంపీగా కృతజ్ఞతలు తెలియజేస్తున్నామని బండి సంజయ్ తెలిపారు.