Jaggareddy: రాహుల్ భారత్ జూడో న్యాయ యాత్రను బీజేపీ అడ్డుకోవడం దారుణం

సంగారెడ్డి జిల్లా: ఏఐసీసీ అగ్రనేత రాహుల్ గాంధీ ( Rahul Gandhi ) చేపట్టిన భారత్ జూడో న్యాయ యాత్రను బీజేపీ అడ్డుకోవడం దారుణమని టీపీసీసీ వర్కింగ్ ప్రెసిడెంట్ జగ్గారెడ్డి ( Jaggareddy ) అన్నారు. సోమవారం నాడు గాంధీభవన్‌లో ఆయన మీడియాతో మాట్లాడుతూ... దేశంలో ద్వేషాలు కాదు.. ప్రేమ పెంపొందించాలని రాహుల్ యాత్ర చేస్తుంటే బీజేపీ నేతలు అడ్డుకునే ప్రయత్నం చేయడం నిజంగా సిగ్గు చేటని చెప్పారు. భయంతో బీజేపీ నేతలు ఇలాంటి దాడులు చేస్తున్నారని మండిపడ్డారు. అన్ని కులాలు, మతాలు ఒక్కటేనని ప్రేమతో బతకాలని రాహుల్ భారత్ జోడో యాత్ర చేస్తున్నారని అన్నారు. మణిపూర్‌లో రెండు వర్గాల మధ్య జరిగిన హింస ఘటనపై కూడా రాహుల్ ప్రశ్నించారన్నారు. బీజేపీ నేతలు ఇలాంటి పద్ధతులు మానుకోవాలని సూచించారు. అస్సాంలో బీజేపీ నేతలు ప్రవర్తించిన తీరు సరికాదని.. తాము తీవ్రంగా ఖండిస్తున్నామని జగ్గారెడ్డి అన్నారు.