Mahesh Babu: వరద బాధితులకు సూపర్ స్టార్ మహేశ్ విరాళం.. సీఎంను కలిసి..
ABN , Publish Date - Sep 23 , 2024 | 04:30 PM
తెలుగు రాష్ట్రాల వరద బాధితులను ఆదుకునేందుకు సూపర్ స్టార్ మహేశ్ బాబు ముందుకొచ్చారు. ఈ మేరకు తెలంగాణ సీఎం రేవంత్ రెడ్డిని కలిసి విరాళానికి సంబంధించిన రూ.50లక్షల చెక్కును అందజేశారు. అలాగే ఏఎంబీ మాల్ తరఫున మరో రూ.10లక్షలు అందజేశారు.
హైదరాబాద్: బంగాళాఖాతంలో అల్పపీడనం కారణంగా కురిసిన భారీ వర్షాలకు రెండు తెలుగు రాష్ట్రాల ప్రజలు తీవ్రంగా నష్టపోయిన సంగతి తెలిసిందే. అయితే వారిని ఆదుకునేందుకు సినీ హీరో, సూపర్ స్టార్ మహేశ్ బాబు ముందుకు వచ్చారు. ఇప్పటికే ఆయన ఏపీ, తెలంగాణ రాష్ట్రాలకు చెరో రూ.50లక్షల చొప్పున ప్రకటించారు. ఈ మేరకు ఇవాళ(సోమవారం) తెలంగాణ సీఎం రేవంత్ రెడ్డిని కలిసి దానికి సంబంధించిన రూ.50లక్షల చెక్కును అందజేశారు. అలాగే ఏఎంబీ మాల్ తరఫున మరో రూ.10లక్షలు అందజేశారు. దీంతో ఆయన తెలంగాణకు మెుత్తంగా రూ.60లక్షలు ఇచ్చినట్లు అయ్యింది. జూబ్లీహిల్స్‌లోని సీఎం నివాసంలో ముఖ్యమంత్రిని మర్యాదపూర్వకంగా కలిసి మహేశ్ చెక్కు అందజేశారు. మహేశ్ బాబుతోపాటు ఆయన సతీమణి నమ్రత శిరోద్కర్ కూడా ఉన్నారు. వారిని మర్యాదపూర్వకంగా ఆహ్వానించిన సీఎం ఇద్దరినీ శాలువాతో సన్మానించారు.
మహేశ్ లుక్ వైరల్..
అయితే చెప్పిన దాని కన్నా అదనంగా మరో రూ.10లక్షలు ఇవ్వడంపై ఆయన ఫ్యాన్స్ హర్షం వ్యక్తం చేస్తున్నారు. మహేశ్ బాబు తన మంచి మనస్సును మరోసారి చాటుకున్నారని సోషల్ మీడియా వేదికగా కామెంట్లు పెడుతున్నారు. ఇప్పటికే ఆయన చాలా మంది పిల్లలకు గుండె ఆపరేషన్లు సహా పలువురిని ఆదుకున్నారని గుర్తు చేసుకుంటున్నారు. తమ అభిమాన నటుడికి మంచి మనసు ఉందంటూ ఆనందం వ్యక్తం చేస్తున్నారు. మరోవైపు మహేశ్ బాబు కొత్త లుక్ వైరల్ అవుతోంది. డైరెక్టర్ రాజమౌళితో మహేశ్ చేస్తున్న ‘SSMB 29’ సినిమా కోసం సూపర్ స్టార్ నయా లుక్‌లో కనిపించారు. దీనికి సంబంధించిన ఫొటోలు సోషల్ మీడియాలో వైరల్‌గా మారాయి. దీంతో ఈసారి భారీ విజయం ఖాయమంటూ ఫ్యాన్ సంబరపడిపోతున్నారు.
నేను మీకు పెద్ద ఫ్యాన్..
సీఎం రేవంత్ రెడ్డిని మహేశ్ బాబు దంపతులు కలిసిన సందర్భంలో సీఎం ఇంటి వద్ద ఆసక్తికర సన్నివేశం చోటు చేసుకుంది. అదే సమయంలో రేవంత్ రెడ్డిని కలిసేందుకు తెలంగాణ పంచాయతీ రాజ్, గ్రామీణాభివృద్ధి శాఖ మంత్రి సీతక్క అక్కడి వచ్చారు. అయితే మంత్రిని చూసిన నమ్రత ఆమె వద్దకు వెళ్లారు. మిమ్మల్ని కలవడం సంతోషంగా ఉందని, నేను మీకు పెద్ద ఫ్యాన్ అంటూ సీతక్కకు చెప్పారు. అనంతరం మంత్రితో కలిసి పలు ఫొటోలు దిగారు. మంత్రి సీతక్క, నమ్రతకు సంబంధించిన ఫొటోలు సైతం సోషల్ మీడియాలో వైరల్‌గా మారాయి.
ఈ వార్తలు కూడా చదవండి:
Gongidi Suntiha: మంత్రి కోమటిరెడ్డికి విలువలు లేవు... గొంగడి సునీత విసుర్లు
Bathukamma Fest: పూలనే దేవుళ్లుగా కొలిచే ఆడబిడ్డల పండుగ.. బతుకమ్మ విశేషాలు తెలుసా
Harish: బీహార్‌‌లా తెలంగాణను మారుస్తున్నారు.. హరీష్ ఆగ్రహం
