KTR: రేవంత్ ప్రభుత్వంపై కేటీఆర్ షాకింగ్ కామెంట్స్

హైదరాబాద్: హైదరాబాద్ నగర బ్రాండ్ ఇమేజ్‌తో పాటు తెలంగాణకు ప్రపంచవ్యాప్త గుర్తింపు తీసుకువచ్చేందుకు ప్రతిష్టాత్మక ఫార్ములా ఈని ఎంతో కష్టపడి తీసుకువచ్చామని బీఆర్ఎస్ వర్కింగ్ ప్రెసిడెంట్, మాజీ మంత్రి కల్వకుంట్ల తారక రామారావు(KTR) అన్నారు. ప్రభుత్వం తనపై మోపిన ఫార్ములా ఈ కార్ రేసు అక్రమ కేసు అంశంలో బంజారాహిల్స్‌లోని ఏసీబీ కార్యాలయంలో విచారణకు ఇవాళ(గురువారం) కేటీఆర్ హాజరుకానున్నారు. ఈ సందర్భంగా సామాజిక మాధ్యమం ఎక్స్‌లో కేటీఆర్ కీలక వ్యాఖ్యలు చేశారు. ఎలక్ట్రానిక్ వాహన రంగంలో హైదరాబాద్‌ను గమ్యస్థానంగా మార్చడమనే ఫార్ములా ఈ కార్ రేసును ఓ గొప్ప ఎజెండాతో ముందుకు తీసుకువచ్చామని కేటీఆర్ అన్నారు.

తెలంగాణ మొబిలిటీ వ్యాలీ‌లో ఎలక్ట్రానిక్ వాహనాల ఇన్నోవేషన్, రీసెర్చ్, తయారీ రంగాల్లో పెట్టుబడులు తెచ్చి ఉద్యోగ ఉపాధి కల్పించాలన్న లక్ష్యంగా ఉందని అన్నారు. ఈ సందర్భంగా నిర్వహించిన ఈ- మొబిలిటీ వీక్ ద్వారా రూ.12 వేల కోట్ల పెట్టుబడులను ఆకర్షించగలిగామని చెప్పారు. నీచమైన రాజకీయాలు చేసే చిన్న మనస్తత్వం కలిగిన నాయకులకు ఫార్ములా ఈ కార్ రేసు అంశం అర్థం కాలేదని అన్నారు. కానీ విజ్ఞులైన తెలంగాణ ప్రజలకు ఈ అంశం తెలుసు అని తెలిపారు. తమ ప్రభుత్వ విజన్‌ను , నిజాన్ని తెలంగాణ ప్రజలు తప్పకుండా గుర్తిస్తారని చెప్పారు. ఎప్పటికైనా సత్యం, న్యాయమే గెలుస్తుందని కేటీఆర్ తెలిపారు.

ఈ వార్తలు కూడా చదవండి

Minister Ponnam: తిరుపతి ఘటన తీవ్ర దిగ్ర్భాంతికి గురిచేసింది: మంత్రి పొన్నం

MP Etala: ఆకలి ఉన్న వారికే అధికారం రావాలి..

Hyderabad: హైడ్రాకు ఫిర్యాదులపై రంగంలోకి రంగనాథ్‌

Read Latest Telangana News and Telugu News