Purandeswari : ఏపీలో నేడు అరాచక పాలన సాగుతోంది

విజయవాడ: ఏపీలో నేడు అరాచక పాలన సాగుతోందని ఏపీ బీజేపీ అధ్యక్షురాలు దగ్గుబాటి పురంధరేశ్వరి ( Daggubati Purandeswari ) అన్నారు. శనివారం నాడు బీజేపీ పార్టీ కార్యాలయంలో ఆమె మీడియాతో మాట్లాడుతూ..‘‘ఏపీలో విద్వేషపూరిత పాలనను నేడు మనమంతా చూస్తున్నాం. చాలా ప్రాంతాల్లో వైసీపీ నాయకులు ఇసుకను దోచుకుంటూ.. కోట్లు కూడేసుకుంటున్నారు. ఎవరైనా ఇసుక అక్రమాలపై ప్రశ్నిస్తే.. సమాధానం మాత్రం చెప్పరు. అడిగిన వారిపై వ్యక్తిగత దూషణలు చేస్తూ.. వారిపైనే ఎస్సీ, ఎస్టీ కేసులు పెడుతున్నారు. వైసీపీ ప్లెక్సీ చింపారని హోంమంత్రి నియోజకవర్గంలోనే ఒక ఎస్సీ యువకుడు పురుగుల మందు తాగి చనిపోయాడు. నా ఎస్సీ, నా ఎస్టీ అని చెప్పుకునే జగన్ ఆ కుటుంబానికి ఏమి న్యాయం చేశారని ప్రశ్నిస్తున్నా. సామాజిక న్యాయం పేరుతో బస్సు యాత్ర ప్రచార ఆర్భాటమే. చనిపోయిన యువకుడి కుటుంబానికి సామాజిక న్యాయం ఏం చేశారు. రాష్ట్రంలో జరుగుతున్న అవినీతి, అక్రమాలను, మోదీ చేసిన మేలును ప్రజల్లోకి తీసుకు వెళ్లాలి. గ్రామగ్రామాన ఉన్న బీజేపీ నాయకులు ప్రజల్లోకి వెళ్లి ఈ అంశాలను వివరించాలి’’ అని పురంధరేశ్వరి తెలిపారు.