IND vs AUS: టాస్ గెలిచిన ఆస్ట్రేలియా.. టీమిండియా తుది జట్టులో కీలక మార్పు!

చెన్నై: వన్డే ప్రపంచకప్‌లో భారత్ ప్రయాణం ప్రారంభమైంది. భారత్‌తో మ్యాచ్‌లో ఆస్ట్రేలియా టాస్ గెలిచి ముందుగా బ్యాటింగ్ ఎంచుకుంది. ముందుగా వచ్చిన వార్తల ప్రకారమే ఈ మ్యాచ్‌లో గిల్ ఆడడం లేదు. ఓపెనర్ శుభ్‌మన్ గిల్ అనారోగ్యం నుంచి ఇంకా కోలుకోలేదని, దీంతో అతను ఈ మ్యాచ్ ఆడడం లేదని టాస్ సమయంలో కెప్టెన్ రోహిత్ శర్మ చెప్పాడు. దీంతో గిల్ స్థానంలో ఇషాన్ కిషన్ ఆడనున్నట్టు వెల్లడించాడు. మ్యాచ్ జరిగే చెన్నై పిచ్ స్పిన్‌కు అనుకూలించనుండడంతో ఈ మ్యాచ్‌లో టీమిండియా ముగ్గురు స్పిన్నర్లతో బరిలోకి దిగుతుంది. ఈ ప్రపంచకప్‌లో రెండు జట్లకు ఇదే మొదటి మ్యాచ్ కావడంతో గెలుపే లక్ష్యంగా బరిలోకి దిగుతున్నాయి. ఈ మ్యాచ్‌లో గెలిచి ప్రపంచకప్‌లో శుభారంభం చేయాలని భావిస్తున్నాయి.

తుది జట్లు

ఆస్ట్రేలియా: డేవిడ్ వార్నర్, మిచెల్ మార్ష్, స్టీవెన్ స్మిత్, మార్నస్ లాబుషేన్, కామెరాన్ గ్రీన్, అలెక్స్ కారీ(వికెట్ కీపర్), గ్లెన్ మాక్స్‌వెల్, పాట్ కమిన్స్(కెప్టెన్), మిచెల్ స్టార్క్, జోష్ హేజిల్‌వుడ్, ఆడమ్ జంపా

భారత్ : రోహిత్ శర్మ (కెప్టెన్), ఇషాన్ కిషన్, విరాట్ కోహ్లీ, శ్రేయాస్ అయ్యర్, కెఎల్ రాహుల్ (వికెట్ కీపర్), హార్దిక్ పాండ్యా, రవీంద్ర జడేజా, రవిచంద్రన్ అశ్విన్, కుల్దీప్ యాదవ్, జస్ప్రీత్ బుమ్రా, మహ్మద్ సిరాజ్

గత రికార్డులు

భారత్, ఆస్ట్రేలియా గత రికార్డులను ఒకసారి పరిశీలిస్తే.. రెండు జట్లు వన్డే ఫార్మాట్లో ఇప్పటివరకు 149 సార్లు తలపడ్డాయి. ఇందులో అత్యధికంగా ఆస్ట్రేలియా 83 మ్యాచ్‌ల్లో గెలిచింది. టీమిండియా 56 మ్యాచ్‌ల్లో గెలిచింది. 10 మ్యాచ్‌ల్లో ఫలితం తేలలేదు. వన్డే ప్రపంచకప్‌లో రెండు జట్లు ఇప్పటివరకు 12 మ్యాచ్‌ల్లో పోటీపడ్డాయి. ఆస్ట్రేలియా 8, భారత్ 4 మ్యాచ్‌ల్లో గెలిచింది. ఇక ఈ మ్యాచ్ జరిగే చెన్నై చెపాక్ పిచ్‌పై ఇప్పటివరకు 23 వన్డే మ్యాచ్‌లు జరగగా మొదట బ్యాటింగ్ చేసిన జట్లు 14 సార్లు, సెకండ్ బ్యాటింగ్ చేసిన జట్లు 8 సార్లు గెలిచాయి. ఇక్కడ మొదటి ఇన్నింగ్స్ సగటు స్కోర్ 233 పరుగులుగా ఉంది. సెకండ్ ఇన్నింగ్స్ సగటు స్కోర్ 205గా ఉంది. అత్యధిక స్కోర్ 337గా ఉంది. అత్యల్ప స్కోర్ 69గా ఉంది. ఇక్కడ టాస్ గెలిచిన జట్లు 16 మ్యాచ్‌లు గెలవగా.. టాస్ ఓడిన జట్లు 6 సార్లు మాత్రమే గెలిచాయి.