Viral Video: సందట్లో సడేమియా.. తుఫాను బీభత్సం సృష్టిస్తోంటే నడిరోడ్డుపై ఈ వ్యక్తి ఏం చేస్తున్నాడో మీరే చూడండి..!
ABN , First Publish Date - 2023-12-06T14:52:52+05:30 IST
మైచాంగ్ తుఫాను తుఫాను కారణంగా భారీ వర్షాలు కురుస్తున్నాయి. దీని ప్రభావంతో తమిళనాడు, ఆంధ్రప్రదేశ్‌లోని పలు జిల్లాల్లో భారీ నుంచి అతి భారీ వర్షాలు కురుస్తున్న విషయం తెలిసిందే. ఇక చెన్నైలో అయితే పరిస్థితి మరీ దారుణంగా ఉంది. ఎక్కడ చూసినా...
మైచాంగ్ తుఫాను తుఫాను కారణంగా భారీ వర్షాలు కురుస్తున్నాయి. దీని ప్రభావంతో తమిళనాడు, ఆంధ్రప్రదేశ్‌లోని పలు జిల్లాల్లో భారీ నుంచి అతి భారీ వర్షాలు కురుస్తున్న విషయం తెలిసిందే. ఇక చెన్నైలో అయితే పరిస్థితి మరీ దారుణంగా ఉంది. ఎక్కడ చూసినా వరదనీటితో చెన్నై నగరం అతలాకుతలమైంది. గత 70, 80 సంవత్సరాల్లో ఇంత వర్షపాతం ఎప్పుడూ నమోదవలేదని వాతావరణశాఖ అధికారులు చెబుతున్నారు. చెన్నైలోని రోడ్లపై ఎక్కడ చూసినా వరదనీరే కనిపిస్తోంది. దీంతో ప్రజలు, వాహనదారులు తీవ్ర ఇబ్బందులు పడుతున్నారు. ఇదిలావుండగా, తాజాగా, చెన్నై నగరంలో చోటు చేసుకున్న ఓ తమాషా సంఘటనకు సంబంధించిన వీడియో నెట్టింట తెగ వైరల్ అవుతోంది. ఓ వైపు తుఫాను బీభత్సం సృష్టిస్తుంటే.. మరో వైపు ఓ వ్యక్తి సందట్లో సడేమియా అంటూ సంబరపడుతున్నాడు. అతడు చేసిన పని చూసి నెటిజన్లు తెగ నవ్వుకుంటున్నారు.
సోషల్ మీడియాలో ఓ వీడియో (Viral video) తెగ వైరల్ అవుతోంది. భారీ వర్షాల కారణంగా చెన్నైలోని (Chennai) వీధులు వరద నీటిలో మునిగిపోయాయి. కొన్నిచోట్ల వరదనీటిలో పెద్ద పెద్ద చేపలు కూడా కొట్టుకొస్తున్నాయి. ఇలావుండగా, భారీ వర్షంలో ఓ వ్యక్తి రోడ్డుపై నడుస్తూ వెళ్తుండగా.. రోడ్డుపై ప్రవహిస్తున్న వరద నీటిలో ఓ పెద్ద చేప (big fish) కనిపించింది. దాన్ని చూడగానే అతను ఎగిరిగంతేశాడు. ‘‘ఎలాగైనా ఈ చేపను పట్టుకెళ్లి.. పులుసు చేసుకోవాలి’’.. అనుకుంటూ దాన్ని పట్టుకునేందుకు ప్రయత్నిస్తాడు. అయితే చేపను ఇలా పట్టుకోగానే.. అలా జారి మళ్లీ నీళ్లలో పడిపోతుంది. దీంతో అతను కంగారుపడిపోతాడు.
ఎక్కడ చేప జారిపోతుందో అనే కంగారుతో దాని వెంటే వేగంగా వెళ్లి.. కాళ్లతో తన్ని నీటిలోంచి పక్కకు విసిరేస్తాడు. ఇలా చివరకు చేపను గట్టిగా పట్టుకుని అక్కడి నుంచి వెళ్లిపోయేందుకు ప్రయత్నిస్తాడు. రోడ్డుపై ఇతడిలాగానే చాలా మంది పెద్ద పెద్ద చేపలను పట్టుకెళ్లడం కూడా వీడియోలో చూడొచ్చు. ఈ క్రమంలో చేపల విషయంలో వారి మధ్య గొడవలు కూడా జరిగినట్లు కనిపిస్తోంది. మొత్తానికి ఈ వీడియో సోషల్ మీడియాలో తెగ వైరల్ అవుతోంది. దీనిపై నెటిజన్లు వివిధ రకాలుగా స్పందిస్తున్నారు. ‘‘ఈ రోజు మనోడికి పండగే’’.. అని కొందరు, ‘‘ఎవడి పిచ్చి వాడికి ఆనందం’’.. అని మరికొందరు, ‘‘రోడ్డుపై చేపల వేట.. సూపర్’’.. అంటూ ఇంకొందరు కామెంట్లు చేస్తున్నారు. ఈ వీడియో ప్రస్తుతం 2 మిలియన్లకు పైగా వ్యూస్‌ను సొంతం చేసుకుంది.
