NTR Death Anniversary: తెలుగుదనానికి ప్రతిరూపం ఎన్టీఆర్ : మంత్రి నారా లోకేష్

అమరావతి: తెలుగుదేశం వ్యవస్థాపకులు, దివంగత మాజీ ముఖ్యమంత్రి ఎన్టీఆర్ 29వ వర్థంతి సందర్భంగా కుటుంబ సభ్యులు, రాజకీయ ప్రముఖులు, అభిమానులు ఘనంగా నివాళులర్పించారు. ఈ సందర్భంగా సోషల్ మీడియా వేదికగా ఏపీ విద్యా, ఐటీ శాఖల మంత్రి నారా లోకేష్ తన తాతయ్య ఎన్టీఆర్‌ను స్మరించుకున్నారు. ‘‘యుగపురుషుడు, విశ్వవిఖ్యాత నటసార్వభౌముడు అన్న నందమూరి తారక రామారావు 29వ వర్థంతి సందర్భంగా ఆ మహనీయునికి ఘన నివాళి అర్పిస్తున్నాను. ఎన్టీఆర్ అనేది ఒక పేరు కాదు.. ప్రభంజనం. అదొక సంచలనం. తెలుగువాడి విశ్వరూపం. వెండితెరపై రారాజుగా వెలుగొందారు, రాజకీయాల్లో మహానాయకుడిగా రాణించారు. తెలుగుదనానికి ప్రతిరూపంగా నిలిచారు. తెలుగుజాతి ఆత్మగౌరవం, సామాజిక న్యాయం, ప్రజాసంక్షేమం అనే సిద్ధాంతాలపై తెలుగుదేశం పార్టీ నిర్మితమైంది. సమాజమే దేవాలయం- ప్రజలే దేవుళ్లని ఎన్టీఆర్ నినదించారు. కోట్లాది హృదయాల్లో కొలువైన మా తాతగారే నాకు నిత్యస్ఫూర్తి. ఆయన వర్థంతి సందర్భంగా ఇవే నా ఘన నివాళులు’’ అని నారా లోకేష్ స్మరించుకున్నారు.

కాగా.. ఎన్టీఆర్ 29వ వర్ధంతిని ఘనంగా నిర్వహించేందుకు టీడీపీ ఏర్పాట్లు చేసింది. ఏపీవ్యాప్తంగా పార్టీ నాయకులు, కార్యకర్తలు, అభిమానులు వర్ధంతిని ఘనంగా నిర్వహించాలని టీడీపీ హై కమాండ్ పిలుపునిచ్చింది. ఏపీవ్యాప్తంగా సేవా కార్యక్రమాలు, రక్తదాన శిబిరాలు నిర్వహించడానికి నేతలు అన్ని ఏర్పాట్లు చేపట్టారు. సమాజానికి ఉపయోగపడేలా పలు సేవాకార్యక్రమాలను పెద్దఎత్తున నిర్వహించేలా ఏర్పాట్లు చేసుకున్నారు. ఈ సందర్భంగా ఎన్టీఆర్ విగ్రహాల వద్ద టీడీపీ నేతలు, కార్యకర్తలు ఘనంగా నివాళులు అర్పించనున్నారు. మైదుకూరులో ఎన్టీఆర్ వర్ధంతి కార్యక్రమంలో ముఖ్యమంత్రి చంద్రబాబు పాల్గొని నివాళి అర్పించనున్నారు. నేడు కడపజిల్లా మైదుకూరులో సీఎం చంద్రబాబు పర్యటించనున్నారు. స్వచ్చాంధ్ర స్వచ్చదివస్ కార్యక్రమాన్ని సీఎం చంద్రబాబు ప్రారంభించనున్నారు. ఎన్టీఆర్ వర్ధంతితో పాటు పలు అభివృద్ది కార్యక్రమాల్లో సీఎం చంద్రబాబు పాల్గొంటారు.