గాంధీనగర్: గుజరాత్ అసెంబ్లీ ఎన్నికల్లో (Gujarat Assembly Elections 2022) క్రికెటర్ రవీంద్ర జడేజా (Ravindra Jadeja) భార్య, సోదరి తలపడే అవకాశముంది. జామ్‌నగర్ నార్త్ నియోజకవర్గం నుంచి వీరిద్దరూ తలపడే అవకాశం ఉంది. రవీంద్ర జడేజా భార్య రివబా జడేజా (Rivaba Jadeja) బీజేపీ (BJP) అభ్యర్థిగా పోటీ చేసే అవకాశం ఉంది. 2019లో ఆమె బీజేపీలో చేరారు. అదే సమయంలో జడేజా సోదరి నైనా జడేజా (Naina Jadeja) కాంగ్రెస్ (Congress) పార్టీ తరపున జామ్‌నగర్ నార్త్ (Jamnagar North) నియోజకవర్గం నుంచే పోటీపడతారని సమాచారం. ప్రస్తుతం కాంగ్రెస్ పార్టీ జిల్లా అధ్యక్షురాలిగా ఉన్న నైనా జడేజాకు జామ్‌నగర్ నార్త్ నియోజకవర్గంలో టికెట్ దక్కవచ్చని ప్రచారం జరుగుతోంది. వీరిద్దరికీ ఆయా పార్టీల నుంచి ఇంకా టికెట్లు కన్‌ఫమ్ కాలేదు. టికెట్లు ఖరారైతే ఆసక్తికర పోరు తప్పదని రాజకీయ పరిశీలకులు చెబుతున్నారు. అయితే వీరిద్దరిలో రవీంద్ర జడేజా ఎవరికి మద్దతిస్తారనే విషయంపై సర్వత్రా ఆసక్తి నెలకొంది. భార్య విజయం కోరుకుంటాడా లేక సోదరి గెలవాలనుకుంటాడా అనే విషయంపై రకరకాలుగా మాట్లాడుకుంటున్నారు.

182 మంది సభ్యులున్న గుజరాత్ అసెంబ్లీకి డిసెంబర్ ఒకటి, ఐదో తేదీల్లో రెండు విడతలుగా ఎన్నికలు జరగనున్నాయి. అదే నెల 8న ఫలితాలు వెలువడతాయి.