ఒకటి కాదు రెండు కాదు ఏకంగా 1,140 చప్పట్లు. అది కూడా కేవలం నిమిషంలో...

చూస్తే ఏ ఫ్యాక్టరీలలోనో రోబోటిక్ యంత్రాలు పని చేయడం కోసం వాటి చేతులను కదిలించినట్టు అనిపిస్తుంది. మరీ అంత వేగంగా కదిలిస్తే రోబోలు సైతం తొందరగా పాడైపోతాయి ఏమో. కానీ ఈ ఫీట్‌ను సునాయాసంగా సాధించేశాడు 20 ఏళ్ళ కుర్రాడు. అసలు విషయంలోకి వెళితే..

ప్రతి ఒక్కరూ తాము ప్రత్యేకంగా ఉండటం కోసం, అందరి దృష్టిలో పడటం కోసం వింత వింత విషయాలలో ప్రతిభ పెంచుకుని వాటిని ప్రదర్శిస్తూ ఉంటారు. అమెరికాలోని డావెన్ పోర్ట్‌కు చెందిన 20 సంవత్సరాల డాల్టన్ మేయర్ అనే కుర్రాడూ అలాగే చేశాడు. అత్యంత వేగంగా చప్పట్లు కొట్టి ఏకంగా గిన్నీస్ బుక్‌లో చోటు సంపాదించుకున్నాడు. ఇతడు ఏకంగా నిమిషంలో 1,140 చప్పట్లు కొట్టాడు. సెకెనుకు సుమారు 19 చప్పట్లు కొట్టి గతంలో ఉన్న రికార్డ్ బ్రేక్ చేశాడు. ఇతను చప్పట్లు కొడుతున్న వీడియో ఇప్పుడు నెట్టింట వైరల్ అవుతోంది. వీడియో చూసినవారు ‘వీడి వేగం తగలెయ్యా అవి చేతులా లేక యంత్రాలా’ అని ముక్కున వేలేసుకుంటున్నారు.