అగ్నిబీజం
ABN, First Publish Date - 2023-10-08T00:57:14+05:30
ఆకాశ కర్మాగారంలో వున్నా అక్రమ క్రూర దానవ కారాగారంలో వున్నా సూర్యుడు సూర్యుడే...
ఆకాశ కర్మాగారంలో వున్నా
అక్రమ క్రూర దానవ కారాగారంలో వున్నా
సూర్యుడు సూర్యుడే...
అంధకారాలను దగ్ధం చేసే ధీరుడే
ఓ! నర్గిస్‌ మొహమ్మదీ!
సూర్యుడు స్త్రీ రూపంలో జన్మిస్తే
అచ్చం నీలాగే ఉంటాడు
నిన్నే అనుసరిస్తూ, నీ అడుగుజాడల్లోనే నడుస్తాడు
నువ్వు నీ గళాన్ని భూగోళం కేంద్ర బిందువులో
ఒక మహాశక్తి బీజంలా నాటావుకదా
అది ఇప్పుడు విశ్వవ్యాప్తమై అందరి అరచేతుల్లో
నవ చైతన్య భానోదయమై ప్రకాశిస్తోంది
పోరాట పటిమకు పర్యాయపదమైన
నీ జీవితం ప్రపంచ మానవాళికి
ఒక నిత్య పారాయణ గ్రంథం
అందరికీ అదొక దారిదీపం
ఒక ధైర్యం, ఒక శాశ్వత ఆలంబనం
నీ సంకల్ప సమరం
అనంత చైతన్యం సైతం
మురిసిపోయే ఒక అగ్నిబీజం
ఓ! నర్గిస్‌ మొహమ్మదీ, నీకు
శతసహస్రకోటి హస్తాలతో
సెల్యూట్‌... సెల్యూట్‌... సెల్యూట్‌
శాతవాహన
(నర్గిస్‌ మొహమ్మదీకి నోబెల్‌శాంతి పురస్కారం ప్రకటించిన సందర్భంగా)
Updated Date - 2023-10-08T00:57:14+05:30 IST